एनएस चिह्न अनिवार्यतामा जोड, स्वदेशी उत्पादन प्रवर्द्धन गर्न मन्त्री यादवको आग्रह

साउन १९ , काठमाडौं ।उद्योग, वाणिज्य तथा आपूर्ति मन्त्री गौरीकुमारी यादवले स्वदेशी उत्पादनको गुणस्तर सुनिश्चित गर्दै बजार विस्तार गर्न नेपाल गुणस्तर (एनएस) चिह्नको प्रयोगलाई प्राथमिकता दिन उद्योगी तथा व्यवसायीलाई आग्रह गरेकी छन्।
नेपाल गुणस्तर तथा नापतौल विभागका पदाधिकारीसँगको छलफलमा मन्त्री यादवले स्वदेशमै उत्पादन हुने वस्तुको गुणस्तर सुनिश्चित गर्न एनएस चिह्नको दायरा विस्तार गर्नुपर्नेमा जोड दिइन्। उनले उक्त चिह्नले उपभोक्तामाझ विश्वास बढाउनुका साथै स्वदेशी उत्पादनको प्रवर्द्धनमा महत्वपूर्ण भूमिका खेल्ने बताइन्।
उनका अनुसार, नेपालमा उत्पादित वस्तुहरूलाई आन्तरिक बजारमा सहज रूपमा बिक्री वितरण गर्न र उपभोक्ताको विश्वास जित्न एनएस चिह्न आवश्यक छ। यसका लागि सरकारले उद्योगी–व्यवसायीलाई आवश्यक प्रोत्साहन दिने र गुणस्तर चिह्न प्राप्त गर्ने प्रक्रिया अझ सरल बनाउने निर्णय गरेको जानकारी दिइन्।
मन्त्री यादवले एनएस चिह्न प्राप्त उत्पादनलाई अन्तर्राष्ट्रिय बजारमा निर्यात गर्न समेत सहज हुने उल्लेख गर्दै मन्त्रालयले आवश्यक सबै प्रक्रियामा सहजीकरण गर्ने प्रतिबद्धता जनाइन्।
हाल नेपालमा सिमेन्ट, रड, टायर लगायत विभिन्न औद्योगिक उत्पादनहरूले एनएस चिह्न प्राप्त गरिसकेका छन्। पछिल्लो समय स्वदेशमै उत्पादन हुने सेनेटरी प्याडले पनि उक्त चिह्न प्राप्त गरेको छ। अझै धेरै उद्योग तथा कम्पनीले यो चिह्न लिन बाँकी रहेकाले समयमै प्रक्रिया पूरा गर्न मन्त्रालयले आह्वान गरेको छ।
मन्त्रालयका अनुसार एनएस चिह्नको प्रयोगले उपभोक्तामा विश्वास वृद्धि गर्नुका साथै नेपाली उत्पादनलाई राष्ट्रिय तथा अन्तर्राष्ट्रिय बजारमा स्थापित गर्न सहयोग पुग्नेछ। यसले विदेशी आयातमा निर्भरता घटाउँदै स्वदेशी उद्योगलाई थप प्रोत्साहन दिने अपेक्षा गरिएको छ।