माघ ४, काठमाडौं । एसियन बक्सिङ कन्फेडरेसन (एएसबीसी) को आयोजना एवं थाइल्यान्ड बक्सिङ संघको समन्वयमा बैंककमा हुने च्याम्पियनसिपमा नेपाली महिला बक्सर त्रिशा जवेगुले ७५ केजी र पुरुष बक्सर विजय बाटाले ८६ केजी तौल समूहमा बाई पाएर कम्तीमा कांस्य पदक पक्का गरेका छन् ।
त्रिशाले काजकिस्तानका येरजहान गुलसायासँग सेमिफाइनलमा प्रतिस्पर्धा गर्नेछन् । विजयको सेमिफाइन भेट भारतीय खेलाडी मुस्किता माइखेलसँग प्रतिस्पर्धा हुनेछ ।
महिला ५७ केजी तौल समूहमा हेमा राईले सिंगापुरका चाव जी मिन बेरनिससँग जनवरी १९ मा र ४८ केजीमा तौलमा सुष्मा तामाङले भियतनामी फाम थी किनहानसँग बुधबार क्वाटरफाइनल खेल्नेछन् । पुरुष ४८ केजी तौल समूहमा नेपालका लालप्रसाद उप्रेतीले फिलिपिन्सका दुरेन मार्क लेफचरसँग जनवरी २० मा र ५७ केजी तौलमा नेपाली खेलाडी इन्द्रबहादुर सुनारले लाओसका सोक्साखोनसँग बुधबार क्वाटरफाइनल प्रतिस्पर्धा गर्नेछन् ।
सुष्माको चौथो र इन्द्रको तेस्रो अन्तर्राष्ट्रिय प्रतियोगिता हो । बाँकी चारले पहिलोपल्ट अन्तर्राष्ट्रिय प्रतियोगिता खेल्न लागेका हुन् ।
प्रशिक्षकमा दीपक महर्जन र सन्दीप श्रेष्ठ तथा व्यवस्थापकमा नेपाल बक्सिङ संघका सदस्य ओमनारायण श्रेष्ठ रहेका छन् ।