ईशा सिंहको शानदार प्रदर्शन, २५ मिटर पेस्तोलमा भारतलाई रजत

असोज १२, काठमाडौं । भारतकी सुटिङ खेलाडी ईशा सिंहले २०२६ को एसियाली खेलकुदमा महिला २५ मिटर पेस्तोलको व्यक्तिगत स्पर्धामा रजत पदक जितेकी छन्। चीनकी सियाओ जियारुइक्सुआनले स्वर्ण पदक जित्दा ईशा दोस्रो स्थानमा रहिन्।

ईशा र सियाओले फाइनलमा समान ३८ हिट स्कोर गरेका थिए। स्वर्णका लागि भएको निर्णायक सुट–अफमा सियाओले ४ं३ को स्कोर निकालिन् भने ईशाले ४ं२ को स्कोर गर्दै रजतमा चित्त बुझाइन्।

ईशाका लागि फाइनल यात्रा सहज भने थिएन। तेस्रो स्थानका लागि दक्षिण कोरियाकी किम ह्योन–सुकसँग उनले तीन पटक सुट–अफ खेल्नुपरेको थियो। त्यसपछि स्वर्ण र रजतको टुंगो लगाउन सियाओसँग थप दुई सुट–अफ पार गरेकी थिइन्।

यसअघि हाङझाउमा भएको २०२३ को एसियाली खेलकुदमा ईशाले यही व्यक्तिगत स्पर्धामा रजत र टिम स्पर्धामा स्वर्ण जितेकी थिइन्। जारी प्रतियोगितामा भने महिला २५ मिटर पेस्तोलको टिम स्पर्धामा भारत पाँचौँ स्थानमा रहँदा व्यक्तिगत स्पर्धामा ईशाले पदक जितेर भारतको पदक संख्या थपेकी हुन्।

ईशाको रजतसँगै २८ सेप्टेम्बरसम्म एसियाली खेलकुदमा भारतको कुल पदक संख्या ३९ पुगेको छ। भारतले ४ स्वर्ण, १७ रजत र १८ कांस्य जितेको विवरण सार्वजनिक भएको छ।