अमेरिका र बेलायतमा एकैदिन २८०० बढीको मृत्यु, विश्वभर संक्रमितको संख्या १५ लाख माथि

चैत २७, काठमाण्डौ । कोरोना भाइरसको संक्रमणबाट अमेरिकामा एकैदिन १९०० मानिसको मृत्यु भएको छ । योसँगै कोरोनाबाट धेरै मानिसको मृत्यु हुने देशको सूचिमा अमेरिका दोश्रो स्थानमा उक्लिएको छ । 

अमेरिकामा एकैदिन १९०० संक्रमितको मृत्युसँगै हालसम्म कुल मृत्यु हुने संक्रमितको संख्या १४ हजार ८०० नजिक पुगेको हो । कुल मृतकको यो संख्या स्पेनको भन्दा केही बढी हो । 

अमेरिकामा पछिल्लो २४ घण्टाभित्र २८ हजार बढी नयाँ संक्रमित फेला परेका छन् । योसँगै अमेरिकामा कोरोना संक्रमितको कुल संख्या ४ लाख २८ हजार नाघेको छ । 

अमेरिकापछि यूकेको अवस्था समेत भयावह देखिएको छ । यहाँ समेत पछिल्लो २४ घण्टाभित्र ९३८ संक्रमितको मृत्यु भएको हो । यूकेमा पनि कुल मृतकको संख्या ७ हजार ९७ पुगेको छ । यहाँ ५ हजार ४९१ नयाँ संक्रमित थपिई कुल संक्रमितको संख्या ६० हजार ७०० माथि पुगेको छ । 

स्पेनमा ७४७ को मृत्यु भई कुल मृतकको संख्या १४ हजार ८०० नजिक पुगेको छ भने यहाँ ६ हजार ३०० हाराहारीमा नयाँ संक्रमित थपिई कुल संक्रमितको संख्या १ लाख ४८ हजार नाघेको छ । 

इटलीमा ५४२ थप संक्रमितको मृत्यु भई कुल मृतकको संख्या १७ हजार ६६९ पुगेको छ भने ३ हजार ८३६ नयाँ संक्रमित थपिएर कुल संक्रमितको संख्या १ लाख ३९ हजार ४०० माथि पुगेको छ । 

फ्रान्समा एकैदिन ५४१ को मृत्यु भएको छ भने जर्मनीमा पनि ३३३ जनाले ज्यान गुमाएका छन् । योसँगै फ्रान्समा हालसम्म कुल मृत्यु हुनेको संख्या १० हजार ८६९ पुगेको छ भने जर्मनीमा २ हजार ३४९ पुगेको छ । कुल संक्रमितको संख्यामा जर्मनी फ्रान्सभन्दा अगाडि छ । जर्मनीमा १ लाख १३ हजार २०० बढीमा कोरोना संक्रमण भइसकेको छ भने फ्रान्समा १ लाख १२ हजार ९०० बढी संक्रमित छन् । 

यो दिन बेल्जियममा २०५, इरानमा १२१, नेदरल्याण्डमा १४७, ब्रजिलमा १२४, टर्कीमा ८७, स्वीडेनमा ९६, भारतमा १८ संक्रमितको मृत्यु भएको छ । 

यसरी हालसम्म विश्वभर कोरोना संक्रमणबाट मर्नेको संख्या ८८ हजार ४०३ पुगेको छ भने यो दिन ८० हजार ३५२ वटा नयाँ केश थपिएर कुल संक्रमितको संख्या १५ लाख ११ हजार माथि पुगेको छ ।