फागुन २८, रुपन्देहीं । झारफुक गर्ने माताले कुटपिट गर्दा रुपन्देही एक बालिकाको मृत्यु भएको छ । मलामी गएकासहित एकै गाउँका २१ जना मानिस पक्राउ परेका छन् ।
रुपन्देही सैनामैना नगरपालिका १० की २२ वर्षीया माता भन्ने सोनिया रेश्मीको कुटपिटबाट सैनामैना नगरपालिका १० की १४ वर्षीया सीता ज्ञवालीको फागुन २० गते मृत्यु भएको प्रहरीले जनाएको छ । बिरामी परेकी उनलाई झाँक्रीकोमा निको पार्ने भन्दै माताको घरमा लगिएको थियो ।
प्रहरीले माता भनिने सोनिया रेश्मी, मृतक बालिकाका बाबुसहित १७ जनालाई पक्राउ गरेको रुपन्देही प्रहरीले जनाएको छ ।अनुसन्धानको क्रममा गाउँले नै तानिएका छन् । सीतालाई सोनियाले चरम यातना दिइरहे पनि उनका आफन्तले रोक लगाउनुको सट्टा भिडिओ खिचिरहे । सोही यातनाका कारण सीताको मृत्यु भएपछि मृतकका परिवारले राति नै कपिलवस्तुको लक्ष्मणघाटमा लगेर दाहसंस्कार गरी घटना गुपचुप राखेका थिए।
जिल्ला प्रहरी कार्यालय रुपन्देहीका सूचना अधिकारी प्रहरी निरीक्षक दीपक कुँवरका अनुसार घटनाबारे अनुसन्धान भइरहेकाले पक्राउ परेकाको नाम सार्वजनिक नगरिएको बताएका छन् । ‘अहिले अनुसन्धान भइरहेकाले घटनामा संलग्न भएकाहरूबारे अझै अध्ययन गरिरहेका छौं । अनुसन्धान गर्दै जाँदा संलग्न देखिएका सबैलाई पक्राउ गर्छौं,’ उनले भने ।