बलात्कारीलाई क्षमा दिन सक्दैनौँः प्रधानमन्त्री

भदौ १२, ललितपुर । प्रधानमन्त्री केपी शर्मा ओलीले बलात्कारपछि हत्या गरिएका कञ्चनपुरकी बालिका निर्मला पन्तको घटनाको सत्य तथ्य छानबिन हुने बताएका छन्।

मंगलबार प्रतिनिधिसभाको बैठकमा समय लिएर बोल्दै प्रधानमन्त्री ओलीले पछिल्लो समय समाजमा अप्रिय घटना घट्ने गरेको भन्दै स–साना बालिका समेत बलात्कृत हुनु परेकोमा दुख व्यक्त गरे ।

उनले भने, ‘उदाहरणका रुपमा कञ्चनपुरमा एकमहिना अगाडि भएको घटनालाई हेर्न सक्छौ । त्यस घटनाले सबैलाई दुखी बनाएको छ ।’ प्रधानमन्त्रीले कञ्चनपुर घटनामा प्रहरीको भूमिकामा प्रश्न उठ्नेबित्तिकै अर्को छानविन समिति बनाएर पठाएको भन्दै उनले भने, ‘हामीले छानबिन समिति बनायौं । त्यस छानबिन समितिले पनि प्रहरीको भूमिका उपयुक्त नलागेपछि प्रहरी प्रमुख, एसपि, डिएसपी, सिडिओेलाई समेत फिर्ता बोलायौं । अर्को सिडिओे, एसपी पठायौं । त्यसपछि पनि त्यहाँको वातवरण शान्त नभएपछि उच्च स्तरिय ढंगले छानविन गर्न सहसचिवको नेतृत्वमै छानबिन समिति बनाएका छौं । यो बिचमा हामीले एसपीलाई नै निलम्बित ग¥यौ । त्यहाँका कानून फाँटका अधिकृत समेतलाई फिर्ता बोलाईयो ।’

अहिले अरु सिडिओ, एसपी पठाएर छानबिन गरिरहेको प्रधानमन्त्री ओलीले बताए । उनले सरकारले पीडित बालिकाका परिवारलाई समेत दश लाख रुपैयाँ दिएको बताए ।उनले भने, ‘त्यहाको सर्वदलीय बैठकलाई हामीले सम्मान ग¥यौ । प्रदर्शनमा गोली लागेर मृत्यु भएको बालकलाई सहिद घोषणा ग¥यौं ।’

ओलीले अब उक्त घटनाको अहिलेको मात्र नभई पहिलेको समेत निष्पक्ष छानविन हुने बताए । उनले अन्य ठाउँमा समेत भएका यस्ता अपराधिक घटना रोक्न सरकार अत्यन्त संवदेनशिल भएको बताए ।

प्रधानमन्त्री ओलीले भने, ‘चाहे कञ्चनपुरको घटना होस् वा अन्यन्त्र । कुनै पनि बलात्कार घटनाका दोषीलाई क्षमा दिन हामी उदार हुन सक्दैनौँ । अत्यन्तै सक्रियताका साथ निष्पक्षताका साथ हाम्रो पुरा सामथ्र्य लगाएर त्यसको छानबिन हुन्छ ।’