लुम्बिनी प्रदेशमा महिला कर्मचारीले महिनावारी बिदा पाउने

मंसिर काठमाडौं । सरकारी महिला कर्मचारीहरूले अबदेखि महिनावारी (पिरियड्स) बिदा पनि पाउने भएका छन्। महिला कर्मचारीहरूका लागि लुम्बिनी प्रदेश सरकारले यस्तो व्यवस्था गरेको हो। 

लुम्बनी प्रदेश प्रमुख अमिक शेरचनले यही मंसिर २१ गते प्रदेश निजामती सेवाको गठन, सञ्चालन र सेवाका सर्तसम्बन्धी ऐन प्रमाणीकरण गरेका छन्। प्रमाणीकरणपछि उक्त ऐन लागु भएको छ। यसअघि लुम्बनी प्रदेशसभाबाट भदौ २२ गते प्रदेश निजामती सेवा ऐन पास गरिएको थियो। ऐनको दफा ११७ मा कर्मचारीहरूले पाउने बिदा सम्बन्धमा व्याख्या गरेको छ। जसअनुसार अबदेखि महिला कर्मचारीले घर बिदा, महिनावारी (पिरियड्स) बिदा, बिरामी बिदा, प्रसूति बिदा, असाधारण बिदा पाउनेछन्।

एक वर्षमा ५२ दिन शनिबार र करिब १५ दिन सार्वजनिक बिदाको सुविधा उनीहरूले पाएका हुन्छन्। यसैगरी महिला कर्मचारीका हकमा ९८ दिन प्रसूति बिदा तथा उसका पतिलाई समेत १५ दिन सुत्केरी बिदाको सुविधा दिइएको हुन्छ। यसैगरी जागिर अवधिभर तीन वर्ष अध्ययन बिदा तथा थप तीन वर्ष असाधारण बिदाको सुविधासमेत उनीहरूले पाएका हुन्छन्।

आधाजसो निजामती कर्मचारीले आफूले पाएको बिदा सञ्चित गरी अवकाश पाउने बेला १८० दिन बराबरको सुविधा लिने गरेको संघीय मामिला तथा सामान्य प्रशासन मन्त्रालयका एक उपसचिव बताउँछन्।