दिल्लीबाट हिंसापीडित महिलाको उद्धार

असार ३०, काठमाडौं  । कोरोना कहरमाझ अर्घाखाँचीबाट एक अधबैंसे गत शनिबार हतारिएर भारतको दिल्ली पुगे । दिल्ली महिला आयोगको पहलमा प्रहरीले छोरीको उद्धार र ज्वाइँलाई पक्राउ गरेको खबर आएको थियो । 

उद्धार गरिएकी उनकी २१ वर्षीया छोरीलाई दिल्लीस्थित सफदरगन्ज अस्पतालमा उपचारार्थ लगिएको थियो । कानुनी उपचारमा पहल गरिरहेको संस्था आफन्त नेपालका दिल्ली प्रतिनिधि नवीन जोशीका अनुसार उद्धार गरिँदा ती महिला झन्डै अचेत अवस्थामा थिइन् । उनको शरीरमा कुटपिटको दाग देखिन्छ ।

छोरी–ज्वाइँ दिल्लीमा बस्थे । छोरीलाई ज्वाइँले कुटपिट गरेको खबर पाएपछि बाबुले जिल्ला प्रहरी कार्यालय रूपन्देहीमा छोरीको उद्धारका निम्ति असार २५ मा निवेदन दिएका थिए । रूपन्देही प्रहरीले उद्धारमा सहयोग गर्न दिल्ली प्रहरीलाई पत्राचार गरेको थियो ।

दिल्लीस्थित एक अपार्टमेन्टमा भाडामा बस्ने ती महिला निरन्तर हिंसामा परेको कुरा छिमेकमा बस्ने नेपालीले थाहा पाएपछि अर्घाखाँचीमा खबर गरेका थिए । जोशीका अनुसार शारीरिक हिंसासँगै श्रीमान्ले ती महिलालाई नग्न बनाएर भिडियो खिच्ने र जबर्जस्ती अपरिचितहरूसँग संवाद गर्न लगाउने गरेको भिडियोमा देखिन्छ । महिलामाथि करेन्ट लगाउनेदेखि हत्यासम्मको दुष्प्रयास भएको खुलेको छ । ‘झन्डै तीन सातायता समयमा खान नदिने र निरन्तर शारीरिक र मानसिक हिंसा दिने गरेको देखिन्छ,’ जोशीले भने, ‘न्युड भिडियो उनले किन खिचे र त्यसलाई के काममा प्रयोग गरे भन्नेबारे भने प्रहरीले थप अनुसन्धान गरिरहेको छ ।’

तीन वर्षअघि मागी विवाह गरेका उनीहरूको १ वर्षकी छोरी छन् । नेपालमै छँदा पनि श्रीमान्ले बेलाबखत कुटपिट गर्ने गरेको माइती पक्षको भनाइ छ । कान्तिपुरसँग सम्पर्कमा आएका माइती पक्षका अनुसार बुटवलस्थित घरबाट असारको पहिलो साता ज्वाइँ र छोरी दिल्ली गएका थिए ।

- कान्तिपुर