तेतरीको हत्याको आरोपमा सौतेनी छोरा पक्राउ

असोज ९, वीरगञ्ज। तेतरी देवीको हत्या गरेको आरोपमा उनका सौतेनी छोरा जय किशोर यादव पक्राउ परेका छन् ।

कलैया उपमहानगरपालिका - ७ रंगपुर टोल बस्ने २५ वर्षीय जय किशोर यादवलाई असोज ७ गते वीरगञ्ज इनर्वाबाट पक्राउ गरिएको जिल्ला प्रहरी कार्यालय बाराले जनाएको छ ।  

 नागरिकता बनाइदिन आग्रह गर्दै आएकी तेतरीको भदौ ३० गते साँझ हत्या भएको थियो । जय किशोरले सौतेनी आमा तेतरीलाई सामान्य घरायसी विवादका क्रममा घाँटीको अगाडि भागमा खुकुरी प्रहार गरेको प्रहरीको भनाइ छ । उनको घटना स्थलमै मृत्यु भएको थियो । घटनापछि जयकिशोर फरार भएका थिए ।

तेतरीका श्रीमान् ५५ वर्षीय शिवनारायण यादवलाई प्रहरीले घटना भएको भोलिपल्टै पक्राउ गरेको थियो । शिवनारायणले घरायसी विवादका क्रममा छोराले घाँटी काटिदिएको बयान दिएका थिए ।

तेतरी देवीको नागरिकता नबाइदिएको विषयमा विवाद हुँदा घटना भएको जिल्ला प्रहरी कार्यालय बाराका प्रमुख प्रहरी उपरीक्षक होबिन्द्र बोगटीले जानकारी दिए ।

‘तेतरीले श्रीमान् शिवनारायणलाई नागरिकता बनाउनको लागि पटकरपटक आग्रह गरेकी रहिछन्,’ उनले भने ‘शिव नारायणले कान्छी श्रीमती तथा छोरा जय किशोर यादवको दबाबमा नागरिकता बनाउन आलटाल गर्दै आएका रहेछन् । नागरिकता बनाएपछि तेतरीलाई अंश दिनुपर्ने बुझाई उनीहरुको रहेछ ।’

घरमा नागरिकता नबनाएको विषयमा पटक पटक विवाद हुने गरेको र झगडा हुँदा घारिलो हतियारले घाँटी काटेको अभियुक्त जय किशोरले स्वीकार गरेको प्रहरीको भनाइ छ ।‘ अनुसन्धानमा संलग्न एक प्रहरी अधिकारीले भने, ‘ नागरिकता दिएपछि सम्पत्ति पनि दिनुपर्छ भनेर उनको हत्या भएको देखिन्छ ।’

तेतरीलाई यसअघि पनि पटक/पटक मानसिक र शारीरिक याताना दिने गरेको माइती पक्षको दाबी छ ।