तयारीबिनै नयाँ बसपार्कबाट उपत्यका बाहिरिने सार्वजनिक यातायात सञ्चालन गर्ने निर्णयको विरोध

असार ३, काठमाडौं ।पर्याप्त तयारी बिनै राजधानी बाहिर जाने सार्वजनिक यातायातका साधन नयाँ बसपार्कबाट मात्रै सञ्चालन गर्ने निर्णयको विषयमा प्रतिनिधिसभामा प्रश्न उठेको छ । काठमाडौँ महानगरपालिकाले असार १ गतेदेखि नयाँ बसपार्कबाट मात्रै सार्वजनिक सवारी साधन सञ्चालन गर्ने निर्णय गरेपनि पूर्ण कार्यान्वयन नभइरहेको अवस्थामा संसदमा पनि यसबारे प्रश्न उठेको हो । 

काठमाडौँ महानगरपालिकाले असार १ देखि उपत्यकाबाहिर जान नयाँ बसपार्कबाट मात्रै यात्रु चढाउने र ओराल्ने भनि गरेको निर्णयको केही यातायात व्यवसायी र जनस्तरबाट समेत आलोचना हुँदै आएको छ ।  यही विषयमा प्रतिनिधिसभाको आइतबार बसेको बैठकमा बोल्दै सांसद नारायणी शर्माले पर्याप्त तयारीबिनै यो निर्णय लागू हुँदा कार्यान्वयनमा जटिलता थपिएको बताइन् । 

‘हेर्दा निर्णय राम्रो पनि लाग्छ । तर पर्याप्त तयारीबिनै यो निर्णय लागू हुँदा कार्यान्वयनमा जटिलता थपिएको छ’, उनले भनिन्, ‘ कतिपय यातायात व्यवसायी र जनस्तरबाट असन्तुष्टिको स्वर सुनिन थालेको छ ।’

उपत्यकाको अस्तव्यस्त यातायातका कारण एक ठाउँबाट अर्को ठाउँमा जान घण्टौ लाग्ने गरेको उल्लेख गर्दै उनले भनिन्, ‘ महानगरपालिकाको निर्णयले यदि कोही कलंकी बस्छ र दाङ जानु छ भने कलंकीबाट होइन, सास्ती बेहोर्दै बसपार्क गएर बस चढ्नसपर्छ । फर्किँदा पनि कलंकी झर्न पाइन्न, सिधै बसपार्क जानुपर्छ । यो निर्णय झन्झटिलो छ, यसलाई कार्यान्वयनमा लैजाने हो भने सार्वजनिक यातायातमा सुधार गरिनुपर्छ, सीमित बसस्टप लागू गरिनुपर्छ ।’

पर्याप्त तयारी नगरी हचुवाको भरमा अमुक निजी कम्पनीलाई बसपार्क जिम्मा दिने र असन्तुष्टि बढाउने यस कार्य उनले सभामुखमार्फत सम्बन्धित निकायको ध्यानाकर्षण गराउन गराइन् ।यसअघि प्रतिनिधिसभा सदस्य माधव सापकोटाले पनि काठमाडौँ महानगरपालिकाको निर्णयको आलोचना गर्दै सच्याउन माग गरेका थिए । 

महानगरपालिकाको निर्णय राम्रो भएपनि व्यवस्थित बसपार्कसहित सीमित स्थानमा यात्रु झर्ने र ओर्लने स्टपको व्यवस्था गर्दै टिकट काउन्टरपनि व्यवस्थित गरिनुपर्ने माग हुँदै आएको छ ।  यसबारेमा महानगरपालिकाले सरोकारवालासँग छलफलपछि आवश्यक व्यवस्था गर्ने भनेर एक कार्यदल बनाएपनि प्रतिवेदन तयार हुन सकेको छैन ।
रातोपाटी