खोलामा बग्दै गरेकी महिलाको उद्धार

असार २०, सिराहा । सिराहाको गोलबजारमा खोलामा बगिरहेको अवस्थामा आज मध्यान्ह् १२ बजेको समयमा एक महिलाको उद्धार गरिएको छ ।

मैनाबत्ती खोलामा बग्दै गरेको अवस्थामा गोलबजार नगरपालिका ३ कि ४० वर्षीया बिना योञ्जनलाई गोलबजार नगरपालिका वडा नम्बर ३ का वडा अध्यक्ष धनप्रसाद लामा लगायतले उद्धार गरेका हुन् ।

गोलबजार नगरपालिका वडा नंम्बर ३ को जरुवाबाट विकास निर्माणको योजना अनुगमन गरेर घर फर्किने क्रममा वडाध्यक्ष लामा बूढी जमदह खोलामा आएको बाढी तर्न नसकेर खोलावारी नै बसेका थिए । त्यही बेला बाढीले महिलालाई बगाउदै गरेको देखेपछि गाउँलेहरुलाई तत्काल खबर गरेर महिलाको उद्धार गरेको वडा अध्यक्ष लामाले बताए ।

उद्धार गरिएकी बिनाको गोल बजारमा उपचार भईरहेको छ । उनी खतरामुक्त रहेको प्रहरीले बताएको छ ।

आईतबारदेखि आएको अबिरल वर्षापछि सिराहाका खोला नदीहरुमा पानीको बहाब बढेको छ ।

सिराहाको बलान कमला, खुटी, बाबुराम, बुढी जमदह, घुर्मी मैनावती, गागन लगायतका खोलामा पानीको बहाव बढेका कारण नदी आसपास बसोबास गर्ने स्थानीय जोखिममा रहेको प्रहरीले जनाएको छ ।