एनसेल र धुलिखेल अस्पतालको टेलिमेडिसिन कार्यक्रम, ग्रामीण भेगमा स्वास्थ्य सेवामा पहुँच बढ्दै

मंसिर २९, काठमाडौं ।एनसेल र धुलिखेल अस्पतालसँगको सहकार्यमा सञ्चालनमा रहेको एनसेल टेलिमेडिसिन र स्वास्थ्य सूचना कार्यक्रमले देशको स्वास्थ्य सेवाको पहुँच प्रदान गर्ने भएको छ ।

उक्त कार्यक्रमको सफलतापछि बाग्मती प्रदेश सरकारले पनि टलिमेडिसिन सेवालाई अन्य अस्पताल र स्वास्थ्य केन्द्रमा पनि लागू गरेको छ ।कम्पनीले सामाजिक उत्तरदायित्व (सीएसआर) पहल अन्तर्गत सन् २०१९ मा प्रविधि तथा तथ्यांकमा आधारित स्वास्थ्य सेवा प्रदान गर्ने विधि अपनाई ग्रामीण, दूरदराजका सेवाबाट बन्चित समुदायहरुलाई गुणस्तरीय स्वास्थ्य सेवा प्रदान गर्ने उदेश्यका साथ यो कार्यक्रम शुरु गरेको थियो ।उक्त कार्यक्रम कार्यान्वयनमा आएसँगै ग्रामीण भेगका १५ हजारभन्दा बढी घरधुरीका ८० हजारभन्दा धेरैले स्वास्थ्य सेवाको सहज पहुँच पाएका छन् ।सिन्धुपाल्चोकको मानेखर्क, खोलुखुम्बुको डोर्पु, नुवाकोटको थाङ्गसिन र काभ्रेपलाञ्चोकको बोल्डेमा रहेका धुलिखेल अस्पताल अन्तर्गतका चार सामुदायिक स्वास्थ्य केन्द्रहरु मार्फत् कार्यक्रम सञ्चालनमा छ । स्थानियहरुले दीर्घ रोग, नसर्ने रोग, सरुवा रोग लगायतका रोगहरुको उपचार सेवा पाइरहेका छन् ।कम्पनीका प्रमुख कार्यकारी अधिकृत तथा प्रबन्ध निर्देशक जाब्बोर कायुमोभले यो कार्यक्रमले समुदायको विकासमा धरै ठूलो योगदान पुरयाएको छ भन्ने बारेमा उजागर गर्ने बताएका छन् ।

उनले भने,‘एनसेल नेपाल र नेपालीको सेवा र विकासमा योगदान गर्न प्रतिवद्ध छ । डिजिटल राष्ट्र निर्माण र इको–सिस्टमको रूपान्तरणमा योगदान पु¥याउँदै, प्रविधि र डाटामा आधारित स्वास्थ्य सेवा विधिहरू प्रयोग गरी गुणस्तरीय स्वास्थ्य सेवामा पहुँच सुनिश्चित गर्न महत्वपूर्ण भूमिका खेल्न पाउँदा खुसी छौं ।’कम्पनीले धुलिखेल अस्पतालसँगको यो संयुक्त पहलले देशको स्वास्थ्य क्षेत्रमा एक महत्वपूर्ण छाप छोड्न सफल भएको बताएको छ ।

धुलिखेल अस्पतालका अनुसार काभ्रेको धुलिखेल नगरपालिका र पाँचखाल नगरपालिकाले व्यक्तिगत स्वास्थ्य कार्यक्रम अर्थात पर्सनलाईज्ड हेल्थ प्रोग्राम (पीएचपी) लाई लागू गरेका छन् भने अन्य नगरपालिकाले पनि यसको कार्यान्वयनमा चासो राखेका छन् ।यसैगरी, चार वटा सामुदायिक स्वास्थ्य केन्द्रहरुमा टेलिमेडिसिन सेवाको सफलतापछि बाग्मती प्रदेश सरकारले धुलिखेल अस्पतालसँगको सहकार्यमा दुई वटा ग्रामीण अस्पताल र तीन वटा स्वास्थ्य केन्द्रमा टेलिमेडिसिन सेवा कार्यान्वयनमा ल्याएको छ ।

उक्त अस्पतालका पब्लिक हेल्थ एन्ड कम्यूनिटी प्रोग्राम डाइरेक्टर डा विराज कर्माचार्यले एनसेल र धुलिखेल अस्पतालको यस्तो खालको सहकार्यले दूरदराजका समुदायहरुलाई स्वास्थ्य सेवाको पहुँच प्रदान गर्ने पद्दतिमा क्रान्ति नै ल्याएको बताएका छन् ।

बाग्मती प्रदेश सरकारले धुलिखेल अस्पतालको सहकार्यमा रामेछापको मन्थली अस्पताल, रसुवाको जिवजिवे ग्रामिण अस्पताल, सिन्धुलीको लाम्पानटर प्राथमिक स्वास्थ्य केन्द्र, धादिङको सल्यानटार प्राथमिक स्वास्थ्य केन्द्र र नुवाकोटको खरानीटार प्राथमिक स्वास्थ्य केन्द्रमा टेलिमेडिसिन सेवा लागू गरेको छ ।