एनआरएनएमा युवा पुस्ताको उदय हुनुपर्छ :सांसद गौतम

भदौ ५, काठमाडौं । राष्ट्रिय स्वतन्त्र पार्टीकी सांसद सोविता गौतमले एनआरएनएमा युवा पुस्ताको उदय हुनुपर्नेजानकारी दिएकी छन् । गैर आवासीय नेपाली सङ्घ युकेद्वारा आयोजित  शुभकामना तथा धन्यवाद ज्ञापन कार्यक्रममा बोल्दै उनले सो कुरा जानकारी दिएकी हुन् ।

निजी भ्रमणमा हाल बेलायत रहेकी गौतमले एनआरएनहरूले आफ्नो मातृभूमिप्रति गरेको योगदान आफूले नबिर्सेको बताइन् । उनले एनआरएनहरूलाई नेपाल फर्कन मात्रै हैन नेपालमै बस्ने सहज वातावरण सृजना गर्नुपर्ने कुरामा जोड दिइन् । 

उनले एनआरएन नागरिकता, सम्पत्ति सुरक्षा लगायत भूतपूर्व गोर्खाको हक अधिकारको लागि व्यक्तिगत र पार्टीको तर्फबाट पनि पूर्ण सहयोग हुने बताइन्। विश्वभरमा रहेका नेपालीहरूको मुद्दालाई नेपाल सरकारसमक्ष पुर्‍याएर एनआरएनएले कुनै पनि आग्रह पूर्वाग्रहमा नलागी मातृभूमिसंगको सम्बन्धमा पुलको रूपमा काम गर्न उनले जोड दिइन् ।

सम्पूर्ण सङ्घसंस्थाहरू मिलेर आफ्ना छोराछोरीहरूलाई सहभागी गराई नेपालसँगको सम्बन्धलाई थप मजबुत बनाउन आग्रह गरिन् । पछिल्लो समयमा उठेका विभिन्न मुद्दाका कारण नेपाल सरकारले बिर्सन खोजेको हो कि भनेर चिन्तित नहुन र धैर्य गर्न उनले आग्रह गरिन् । विदेशमा बस्ने नेपालीहरूलाई संधैभरी नेपालसँग जोडी राख्ने वातावरण बनाउनुपर्ने र त्यसका लागि देखिएका बाधा अड्चनहरू फुकाउन आफूहरू लागिपर्ने आश्वासन दिइन् ।

‘भूतपूर्व गोर्खा मुद्दाको प्रसङ्ग कोट्याउँदै उनले भनिन्, ‘म नेपाल पुगेर गोर्खाहरूको मुद्दाबारे मेरो पार्टीका अरू नेताहरूसँग पनि छलफल गर्नेछु र आवश्यक सहजीकरण गर्नेछु ।’ नेपाली भन्दा पनि गोर्खालीको रूपमा संसारभर नै परिचय बनाएका गोर्खाहरूको मुद्दा किन ओझेलमा परेको हो यसबारेमा आवाज उठाउने गौतमले बताइन् । 

आफू नेपाल फर्किएपछि विदेशमा बस्ने नेपालीहरूको विषयमा आवश्यक छलफल र पहल गर्ने आश्वासन गौतमले दिइन् ।