राज्यमन्त्री सिर्पालीले लिइन् पद तथा गोपनीयताको शपथ

माघ ४, काठमाडौं । संस्कृति, पर्यटन तथा नागरिक उड्डयन राज्यमन्त्री सुशीला सिर्पाली ठकुरीले पद तथा गोपनीयताको शपथ लिएकी छन् । बुधबार दिउँसो सिंहदरबारस्थित प्रधानमन्त्री पुष्पकमल दाहालले उनलाई राज्यमन्त्रीको रुपमा शपथ ग्रहण गराएका हुन् ।

शपथग्रहण समारोहमा संस्कृति, पर्यटन तथा नागरिक उड्डयनमन्त्री सुदन किराँती पनि उपस्थित थिए । दाहाल नेतृत्वको मन्त्रिपरिषद्‍का २२ मन्त्रीहरूले यसअघि नै शपथ लिइसकेका छन् ।

पर्यटन राज्यमन्त्री सिर्पाली भने मंगलबारको शपथग्रहण समारहोमा छुटेकी थिइन् । उनले आफू काठमाडौं बाहिर भएकाले शपथग्रहणको निर्धारित समयमा उपस्थित हुन नसकेको प्रतिक्रिया दिएकी थिइन् ।

माओवादी पार्टीमा आवद्ध सिर्पाली २३ सदस्यीय मन्त्रिपरिषद्‍मा एक्लो दलित मन्त्रीसमेत हुन् । माओवादीबाटै अर्की महिला नेता रेखा शर्मा सञ्चार तथा सूचना प्रविधिमन्त्री बनिसकेकी छन् ।