हिंसा पीडित महिलाका लागि सुरक्षित आश्रय ‘दिमा आमा घर’

फागुन २५, काठमाडौं । जुम्लामा घरेलु हिंसा पीडित महिलाहरूको सशक्तिकरण, आपतकालीन आश्रय तथा न्याय प्राप्तिका लागि ‘दिमा आमा घर’ स्थापना गरिएको छ।

११५ औँ अन्तर्राष्ट्रिय महिला दिवसको अवसरमा सात जना हिंसा पीडित महिलाहरूको पहलमा चन्दननाथ नगरपालिका–६ मा यो घर सञ्चालनमा आएको हो।

संस्थाका अध्यक्ष दिलमाया शाहीका अनुसार पत्रकारिता क्षेत्रमा कार्यरत रहँदा उनले हिंसा पीडित महिलाहरूको समस्या नजिकबाट अनुभव गरिन्।

कानूनी सहायता खोज्ने क्रममा सदरमुकामसम्म आइपुग्दा सुरक्षित बसोबासको अभाव भएकाले ‘दिमा आमा घर’ आवश्यक भएको उनको भनाइ छ। यस घरले पीडितहरूलाई अल्पकालीन आश्रय प्रदान गर्नुका साथै कानूनी प्रक्रिया पूरा गर्न सहज वातावरण सिर्जना गर्नेछ।

घरबाट निकालिएका, हिंसा सहेर न्याय खोज्न आएका महिलाहरूका लागि यो केन्द्र पहिलो सुरक्षित स्थान बन्ने लक्ष्य राखिएको छ। यस्तै, बलात्कार पीडित बालिकाहरूलाई पनि आवश्यक आश्रय, स्वास्थ्य उपचार तथा न्यायका लागि पैरवी गर्ने व्यवस्था गरिएको छ।

शनिबार आयोजित उद्घाटन कार्यक्रममा जिल्ला समन्वय समितिका प्रमुख गौरीनन्द आचार्यले ‘दिमा आमा घर’ कर्णाली प्रदेशकै नमूना सुरक्षित आश्रय बन्ने विश्वास व्यक्त गरे।

प्रमुख जिल्ला अधिकारी रामबहादुर शाहीले पीडित महिलाहरूका लागि कानूनी सहायता, स्वास्थ्य उपचार र पुनःस्थापनाका लागि संस्थाको भूमिका महत्वपूर्ण रहने बताए।

वरिष्ठ अधिवक्ता देवेन्द्रप्रसाद शर्माले संस्थाले हिंसा पीडितलाई न्याय दिन थप प्रभावकारी भूमिका खेल्ने अपेक्षा राख्दै दिलमाया शाहीसहितको टिमलाई धन्यवाद दिए।

एकीकृत अखिल नेपाल शिक्षक संगठन जुम्लाका अध्यक्ष जयशंकर धिताल र बुद्धिजीवी गोविन्द्र बहादुर शाहीले संस्थालाई निरन्तर सहयोग गर्ने प्रतिबद्धता जनाए।

दिमा आमा घरमा हाल तीनवटा आराम कक्ष, एक भान्साघर र कार्यालय सञ्चालनमा छन्। यो संस्थाले हिंसामा परेका महिलाहरूका लागि सुरक्षित आश्रय उपलब्ध गराउनुका साथै उनीहरूलाई आत्मनिर्भर बनाउन विभिन्न सशक्तिकरण कार्यक्रमसमेत सञ्चालन गर्ने लक्ष्य राखेको छ।