सेवा शुल्कसम्बन्धी कानुनी अन्योल अन्त्य गर्न सांसद अधिकारीको माग

भदौ ३ , काठमाडौं । राष्ट्रिय स्वतन्त्र पार्टी (रास्वपा)की सांसद लिमा अधिकारीले होटल तथा पर्यटन क्षेत्रमा कार्यरत श्रमिकले पाउँदै आएको १० प्रतिशत सेवा शुल्कको व्यवस्थालाई स्पष्ट कानुनी आधारसहित निरन्तरता दिन सरकारसँग आग्रह गरेकी छन्।
बुधबार प्रतिनिधिसभाको बैठकमा बोल्दै उनले सेवा शुल्कसम्बन्धी विवादका कारण श्रमिकको आम्दानी र सामाजिक सुरक्षामा प्रत्यक्ष असर परेको बताइन्। श्रम ऐनमा आवश्यक संशोधन गरेर सेवा शुल्क उठाउने र वितरण गर्ने विषयलाई कानुनी रूपमा व्यवस्थित गर्नुपर्ने उनको भनाइ थियो।
अधिकारीका अनुसार होटल तथा पर्यटन क्षेत्रमा कार्यरत श्रमिकले लामो समयदेखि सेवा शुल्क प्राप्त गर्दै आएका छन्। तर, पछिल्लो समय उत्पन्न कानुनी विवादले यसको कार्यान्वयनमा अन्योल सिर्जना गरेको छ।
उनले सेवा शुल्क श्रमिकको आयसँग प्रत्यक्ष रूपमा जोडिएको विषय भएकाले यसलाई हटाउँदा श्रमिक र उनीहरूका परिवारको जीवनयापनमा नकारात्मक प्रभाव पर्ने बताइन्।
श्रमिकको अधिकार केवल पारिश्रमिकमा मात्र सीमित नहुने उल्लेख गर्दै उनले सामाजिक सुरक्षा सुनिश्चित गर्नु राज्यको दायित्व भएको धारणा व्यक्त गरिन्।
होटल तथा पर्यटन क्षेत्रमा कार्यरत श्रमिकको सामाजिक सुरक्षा सुनिश्चित गर्न नसके श्रम बजारमा असुरक्षा बढ्ने चेतावनी दिँदै उनले श्रमिकको अधिकार संरक्षण र पर्यटन क्षेत्रको दिगो विकासका लागि कानुनी व्यवस्था स्पष्ट बनाउन सरकारसँग माग गरिन्।