संसद् सुधारमा सत्तापक्ष सक्रिय : रास्वपा सचेतक धिताल

काठमाडौं, १२ साउन — राष्ट्रिय स्वतन्त्र पार्टी ९रास्वपा० की सचेतक क्रान्तिशिखा धितालले संसद् बैठकलाई थप प्रभावकारी बनाउन सत्तापक्ष सक्रिय रूपमा लागिरहेको बताएकी छन्।
मंगलबार सिंहदरबारमा सभामुखसँग भएको छलफलपछि सञ्चारकर्मीसँग कुरा गर्दै धितालले लामो समयसम्म निरन्तर सदन सञ्चालन हुँदा सांसदहरू आफ्नो निर्वाचन क्षेत्र र मतदातासँग प्रत्यक्ष सम्पर्कमा रहन नसकेको बताइन्। सोही कारण दुई हप्ताको विश्राम दिइएको उनले स्पष्ट पारिन्।
उनका अनुसार आगामी बैठकहरूलाई अझ व्यवस्थित र प्रभावकारी बनाउने विषयमा प्रारम्भिक छलफल भइसकेको छ। “सरकारले धेरै विधेयकहरू ल्याउने तयारी गरिरहेको छ, जसले संसद्को कार्यसूची अझ व्यस्त बनाउनेछ,” धितालले भनिन्।
धितालले नयाँ संसदीय अभ्यासका क्रममा केही कमजोरी देखिनु स्वाभाविक भएको उल्लेख गर्दै पुराना खराब अभ्यासलाई त्यागेर सकारात्मक र सुधारमुखी पद्धति अपनाउन प्रयास भइरहेको बताइन्।
संसद्मा देखिएको असमझदारी अन्त्यका लागि सत्तापक्ष र प्रतिपक्षबीच निरन्तर संवाद भइरहेको र केही दिनभित्रै सहमति जुट्नेमा आफू विश्वस्त रहेको उनको भनाइ छ।