रिंकु सदाय मृत्यु प्रकरणमा प्रहरीले ८ जनालाई लियो नियन्त्रणमा

फागुन ११, काठमाडौं । सिरहाको नवराजपुर गाउँपालिका-१ भगवतीपुरकी १७ वर्षीया रिंकुकुमारी सदायको मृत्यु भएको घटनामा प्रहरीले ८ जनालाई नियन्त्रणमा लिएको छ।

घटनाबारे सोधपुछ गर्नका लागि शनिबार ८ जनालाई नियन्त्रणमा लिइएको छानबिन समितिका प्रमुख एसएसपी शान्तिराज कोइरालाले जानकारी दिए। 

पञ्चायत बसेका लगायत केही व्यक्तिलाई सोधपुछका लागि नियन्त्रणमा लिएका छौं,एसएसपी कोइरालाले भने,जाहेरी परेकाहरूलाई भने प्रहरीले खोजिरहेको छ।

रिंकुका परिवारले बिहीबार ९ फागुन ८०  इलाका प्रहरी कार्यालय लहानमा सामूहिक जबरजस्ती करणीसहित चारवटा मुद्दामा ८ जनाविरूद्ध पूरक जाहेरी दिएका थिए। 

कर्तव्य ज्यान, जबरजस्तीकरणी, शरीर बन्धक र लेनदेन मिलापत्र गरी चारवटा शीर्षकमा पूरक जाहेरी दिएका हुन्। यसअघि  फागुन १ गते आत्महत्या दुरूत्साहन सम्बन्धीमात्र जाहेरी दिइएको एसएसपी कोइरालाले जानकारी दिए। 

माघ २७ गते राति शौचालय जान भनेर निस्केकी रिंकु कुमारी  २८ गते बिहान ३ बजेमात्र घर फर्किएकी थिइन्।
त्यसपछि २९ र३० गते पञ्चायत बसेर यस घटनामा मेलमिलाप गराइएको थियो। यसबीच विवाद भइरहँदा रिंकु ३० गते साँझ आफ्नै घरमा झुण्डिएको अवस्थामा फेला परेकी थिइन्। 

यस घटनामा प्रहरीले सबै मुद्दाहरूमा अनुसन्धान गरिरहेको एसएसपी कोइरालाले जानकारी दिए।