माघ ६, काठमाडौं । राष्ट्रिय स्वतन्त्र पार्टीले उपसभामुख पदमा इन्दिरा राना मगरलाई उम्मेदवारी बनाउने तयारी गरेको छ ।
शुक्रबार विहान बसेको शीर्ष नेताहरुको बैठकले राना मगरलाई उम्मेदवारी बनाउने तयारी गरेको हो । राना मगरलाई रास्वपाकी सांसद सोविता गौतमले उपसभामुखमा प्रस्ताव गरेकी थिइन् । नेकपा एमालेका कृष्णगोपाल श्रेष्ठ, नेकपा माओवादी केन्द्रकी नारायणी शर्मा र राप्रपाका राजेन्द्र लिङ्देन उनको समर्थक छन् ।
संसद भवन सिंहदरबारमा उपसभामुखको उम्मेदवारी दर्ता गराएपछि पत्रकारसित कुरा गर्दै उनले आफ्नो पार्टी र सत्ता गठबन्धनका दलले आफूलाई यो जिम्मेवारी दिन लागेको बताइन्।
कैद भुक्तान गरिरहेका आमासँगै कारागार पुगेका तथा त्यहीं जन्मिएका बालबालिकाको शिक्षादीक्षामा काम गर्दै आएकी उनले भनिन्, ‘म सधैं सडकमा कराइरहने भुईं मान्छे सबैको साथ पाएर यो ठाउँमा पुग्न लागेकी छु, भुईं मान्छेकै पक्षमा निर्णायक भूमिका खेल्नेछु ।’
उपसभामुखको चुनाव भोलि हुँदैछ ।