मोरङको पथरीमा युवा–युवती एउटै रुखमा झुन्डिएको अवस्थामा मृत फेला

फागुन २०, काठमाडौं । मोरङको पथरीशनिश्चरे नगरपालिका–५ मौलीबारीस्थित बक्राहा खोलाको किनारमा सोमबार बिहान विवाहित युवा–युवती एउटै रुखमा झुन्डिएको अवस्थामा फेला परेका छन् ।

पथरीशनिश्चरे–५ का अन्दाजी २४ वर्षीय अजय टुडू र झापाको गौरीगञ्ज गाउँपालिका–२ घर तथा मोरङको कटहरी गाउँपालिका–६ माइती भएकी २२ वर्षीया जुबामुनी हस्दा खोला किनारको एउटा रुखमा नाइलनको डोरीको पासो लगाएर झुन्डिएको अवस्थामा भेटिएको मोरङ प्रहरीले जनाएको छ । मृत अवस्था भेटिएका दुवै विवाहित भए पनि उनीहरु श्रीमान्–श्रीमती नभएको इलाका प्रहरी कार्यालय पथरीका डिएसपी मोहनविक्रम दाहालले जानकारी दिए ।

घटनास्थल अजयको घरदेखि करिब १ किलोमिटर दक्षिणमा पर्छ भने मृत फेला परेकी जुबामुनीका पति कान्छा टुडू वैदेशिक रोजगारीको सिलसिलामा विदेशमा रहेको प्रहरीले जनाएको छ ।

अजयको पत्नीका साथै ४ र २ वर्षका छोरा घरमा छन् भने जुबामुनीको डेढ वर्षको छोरा छन् । अयजले जुबामुनीलाई गत आइतबार राति आफ्नै घरमा लिएर आएको खुलको छ । अजयको घरमा खाना खाएर राति नै उनी निस्किएका थिए । उनीहरूको सम्पर्क र आउजाउको अवस्था हेर्दा दुवै जना प्रेम सम्बन्धमा रहेको हुनसक्ने प्रहरीले अनुमान गरेको छ ।

घटनास्थलको प्रकृति हेर्दा र प्रारम्भिक अनुसन्धानबाट दुवै जनाले सहमतिमै आत्महत्या गरेको जस्तो देखिए पनि अहिले नै यही ने हो भन्न नसक्ने, डिएसपी दाहालले बताए । घटनाको अनुसन्धानका लागि मोरङ प्रहरी प्रमुख एसपी नारायणप्रसाद चिमरिया घटनास्थल जाँदै गरेको प्रहरीले जनाएको छ ।