'मेड इन नेपाल' ले विश्वमा नेपाली सामग्रीको उपस्थिति बढाएको छ : प्रबन्ध निर्देशक गोल्यान

बैशाख १३, काठमाडौं ।मेड इन नेपालकी अध्यक्ष तथा प्रबन्ध निर्देशक लतिका गोल्यानले नेपाललाई विश्वमा चिनाउन 'मेड इन नेपाल' ले नेपाली सामग्रीहरुको विश्वमा निर्यात सुरु गरेको बताएकी छन् ।

काठमाडौंमा बुधबार कान्तिपुर मिडिया ग्रुपले आयोजना गरेको तेस्रो 'कान्तिपुर इकोनमिक समिट(२०२३) को पहिलो सत्र 'आर्थिक मेरुदण्डको पहिचान र प्राथामिकता' मा बोल्दै आफूले नेपालको कृषि क्षेत्र, उत्पादनलगायत क्षेत्रले विश्वमा आफूलाई चिनाउन महत्त्वपूर्ण भूमिका खेलेको बताइन् ।

उनले विश्वमा थोरैमात्रै नेपाली ब्रान्ड पुगेको बताउँदै नेपाललाई चिनाउन आफूहरूले मेड इन नेपाल सुरु गरेको बताइन् । यसले नेपाली किसान र नव उद्यमीहरूलाई बजार पहिचानका लागि समेत सहयोग गर्ने उनले बताइन् ।

जसरी चीनका अलिबाबाले विश्वको विश्वास जित्न सफल भएका छन् त्यसैगरी नेपाली ब्रान्डलाई विश्वसामू चिनाउन मेड इन नेपालले महत्त्वपूर्ण भूमिका खेलिरहेको उनले बताइन् ।

आफूहरूले नेपाली छुर्पी विश्वमा कुकुरका लागि निकै माग रहेको हुँदा यसको निर्यातमा समेत आफूहरू लागेको बताइन् । नेपाली कला चिनाउने कलात्मक सामग्रीहरुका लागि पनि छुट्टै पोर्टल निर्माण गरेको उनले बताइन् ।

कुनै पनि देशको अर्थतन्त्रमा सेवा, उत्पादन र कृषि गरेर ३ क्षेत्र हुने गरेको र तीनै क्षेत्रलाई सन्तुलन गरेर विकासमा लैजानुपर्ने उनको भनाइ थियो ।नेपालमा रेमिट्यान्स, पर्यटन र जलविद्युत्‌लाई सन्तुलित तरिकाले लैजानुपर्ने गोल्यानले बताइन् ।

'नेपालमा ६६ प्रतिशत जनसंख्या कृषिमा निर्भर छ । यसमा पनि अधिकांश मानिसहरू परम्परागत रुपमा कृषि कार्य गर्दै आएका छन् । उनीहरूलाई आधुनिक तरिकाले कृषि क्षेत्रमा आबद्ध गराउने वातावरण बनाउनुपर्छ,' उनले भनिन् । किसानहरूलाई नयाँ प्रविधिको प्रयोग गरेर आफ्नो सामग्री बजारमा बेच्ने वातावरण सिर्जना गर्नुपर्ने गोल्यानले बताइन् ।

'कृषिमा प्रविधिको प्रयोग नेपालमा लागि निकै महत्त्वपूर्ण रहेको छ । यहाँ अन्य धेरै क्षेत्रमा प्रविधिको प्रयोग भएको छ । तर, नेपाली कृषिको क्षेत्रमा प्रविधिको प्रयोग निकै कम भएको पाइन्छ । विकसित देशहरूमा मल, बिउ छर्नेलगायतका काम ड्रोनजस्ता प्रविधिको प्रयोगबाट गर्ने गरेका छन् । त्यसका नेपाली कृषि क्षेत्रमा पनि हामीले यस्तै वातावरण तयार गर्नुपर्छ ।'