महिलाको ३५ हजार लुटेर फरार भएका युवा डेढ घण्टामा नै पक्राउ

वैशाख ४ काठमाडौं । जिल्ला प्रहरी कार्यालय बागलुङले ३५ हजार रुपैयाँ लुटेर भागेका एक युवालाई डेढ घण्टामा नै नियन्त्रणमा लिएको छ।

कार्यालयका सूचना अधिकारी प्रहरी नायव उपरीक्षक विजय यादवका अनुसार गत मङ्गलवार बागलुङको जैमिनी नगरपालिका–२ दमेककी ३९ बर्षिया माया सापकोटा कुश्मीशेरा बजार जाँदै थिइन्। उनले अपराह्न करिब साढे चार बजेको समयमा जङ्गलको बाटो छेउमा पानी पिउन लागिरहेकी थिइन्। एकान्त जङ्गलको मौका पारेर मैमिनी नगरपालिका–२ कै २२ बर्षिय सुवास सार्कीले मायाले नगद ३५ हजार राखेर पछाडि भिरेको झोला लुटेर फरार भए।

सापकोटाको नगद लुटिएको विषयमा सूचना पाउँदासाथ जिल्ला प्रहरी कार्यालय बागलुङ तथा मातहतका प्रहरी कार्यालयबाट प्रहरी टोली खटियो। अनुसन्धानमा प्रविधिको प्रयोग र हुलियाको आधारमा सुवासको खोजीमा लागेको प्रहरी टोलीले डेढ घण्टामा नै उनलाई नियन्त्रणमा लिन सफल भएको हो।

प्रहरी नायव उपरीक्षक यादवका अनुसार सार्कीलाई बागलुङ नगरपालिका–१ मालढुङ्गास्थित प्रहरी चेक पोस्टबाट साँझ छ बजेको समयमा नियन्त्रणमा लिइएको हो। उनको साथबाट लुटिएको नगद रकम बरामद समेत भएको छ। पीडित सापकोटाको जाहेरीको आधारमा सार्कीलाई बागलुङ जिल्ला अदालतबाट पाँच दिनको म्याद थप गरी अनुसन्धान भइरहेको जिल्ला प्रहरी कार्यालय बागलुङले बताएको छ।