बोहोराको हत्या आरोपमा सुसुरा बुहारी पक्राउ

फागुन २२, काठमाडौं । बन्द कोठाभित्र राधा बोहोराको हत्या गरी बाहिरबाट ताला लगाएको हत्याको आरोपमा प्रहरीले दुई जनालाई पक्राउ गरेको छ। पक्राउ पर्नेमा ठाकुरबाबा नगरपालिका –१ का बोहोराको  ६९ वर्षीय शान्तबहादुर खत्री र उनकी बुहारी २४ वर्षीया  उमाकुमारी खत्रीलाई  प्रहरीले पक्राउ गरेको हो। 

भुरिगाउँ बजार नजिक रहेको आफ्नै घरमा गत फागुन ४ गते बोहराको शव फेला परेको थियो । प्रहरीले लाश फेला पारेपछि घटनास्थलमा तालिमप्राप्त कुकुरसहित अनुसन्धान गरिएको जिल्ला प्रहरी कार्यालय बर्दियाका प्रहरी नायब उपरीक्षक ऋषिराम घर्ती मगरले बताए । हालसम्म लेनदेन र घरायसी दुस्मनीको कारणले हत्या भएको भन्ने अनुसन्धानमा खुल्न आएको उनले बताए। 

हत्यामा संलग्न भएको पुष्टि भएपछि बर्दिया अदालतबाट फागुन १५ गते पक्राउपुर्जी जारी गरी उनीहरूलाई पक्राउ गरेको जिल्ला प्रहरी कार्यालय बर्दियाका कार्यालय प्रमुख प्रहरी उपरीक्षक केदार खनालले जानकारी दिए। 

मृतक बोहोराको शव घरको सुत्ने कोठामा बाँसको खामोमा बाँधेको अवस्थामा फेला परेको थियो । प्रहरीले शवको पोष्टमार्टम गरी आफन्तलाई बुझाइ अनुसन्धान सुरु गरेको थियो ।