बाढी प्रभावित क्षेत्रमा अनावश्यक फोटो–भिडियो नखिच्न रास्वपा सांसदलाई निर्देशन

भदौ १२ , काठमाडौं । सत्तारुढ दल राष्ट्रिय स्वतन्त्र पार्टी ९रास्वपा० ले बाढी तथा विपद् प्रभावित क्षेत्रमा अनावश्यक रूपमा नजान र त्यहाँका दृश्यको फोटो–भिडियो खिचेर सामाजिक सञ्जालमा पोस्ट नगर्न आफ्ना सांसदलाई निर्देशन दिएको छ।

रास्वपाकी सचेतक क्रान्तिशिखा धितालले आइतबार सांसदहरूलाई निर्देशन जारी गर्दै विपद् प्रभावित क्षेत्रमा आवश्यकताअनुसार मात्र जान आग्रह गरेकी हुन्।

निर्देशनमा विशेषगरी बाढी तथा विपद्का दृश्य खिच्ने र सामाजिक सञ्जालमा सार्वजनिक गर्ने काम नगर्न भनिएको छ। प्रभावितप्रति सहानुभूति व्यक्त गर्ने वा सूचना दिने उद्देश्यले गरिएको भए पनि संवेदनशील अवस्थामा त्यस्ता गतिविधिलाई सार्वजनिक रूपमा फरक ढंगले बुझिन सक्ने भन्दै सचेत गराइएको छ।

रास्वपाका केही सांसद भोटेकोशी बाढी प्रभावित क्षेत्रमा पुग्दा उद्धार, राहत तथा व्यवस्थापनमा सहयोग गर्नुभन्दा अनावश्यक ‘इस्टनवाजी’ गरेको आरोप लागेपछि पार्टीले यस्तो निर्देशन दिएको हो।

सचेतक धितालले प्रभावित क्षेत्रमा जानुअघि आफ्नो उपस्थिति, सीप र समयले वास्तविक सहयोग पुग्छ कि थप असहजता सिर्जना हुन्छ भन्ने विषयमा आफैंले मूल्याङ्कन गर्न सांसदहरूलाई आग्रह गरेकी छन्।

उनले विपद्को समयमा प्रभावित क्षेत्रका सांसदलाई आवश्यकताअनुसार सम्बन्धित स्थानमा जान र अन्य सांसदलाई भने आफ्नो स्थानबाट समन्वय तथा सहयोगमा ध्यान दिन आग्रह गरेकी छन्।

रास्वपाले अहिले शुभेच्छा व्यक्त गर्नु मात्र पर्याप्त नहुने भन्दै उपलब्ध सीप, समय र स्रोतलाई वास्तविक राहत तथा उद्धारमा उपयोग गर्नुपर्नेमा जोड दिएको छ।