प्रचण्ड मन्त्रिपरिषदमा एक्लो दलित सदस्य राज्यमन्त्री श्रीपालीको छुट्यो शपथ

माघ ३, काठमाडौंं । नवगठित मन्त्रिपरिषदमा दलित समुदायबाट स्थान प्राप्त गर्ने एकल पात्र सुशीला श्रीपाली बनेकी छन् । मन्त्री तथा राज्यमन्त्रीको शपथमा श्रीपाली छुटेकी छन् । 

गृह जिल्ला अर्घाखाँची रहेकाले उनको पद तथा गोपनीयताको शपथ छुटेको हो । राज्यमन्त्री बनेको खबर थाहा पाएर काठमाडौं आउँदै गरेको श्रीपालीले बताइन् । श्रीपाली माओवादी केन्द्रको तर्फबाट राज्यमन्त्री बनेकी हुन् ।

पहिलो पटक सांसद बनेकी श्रीपालीको राजनीतिक जीवन ३० वर्ष कटेको छ । माओवादी केन्द्रबाट समानुपातिकतर्फबाट सांसद बनेकी श्रीपाली कम्युनिस्ट आन्दोलनमा २०४६ देखिनै लागेकी थिइन् । २०६८ मा उनी दलित आयोगको सदस्य भएकी श्रीपाली माओवादी केन्द्रको केन्द्रीय सदस्य छिन् । उनका श्रीमान डम्मरसिंह ठकुरी सेना समायोजनमार्फत नेपाली सेनामा छन् ।