माघ १, काठमाडौं। मंगलबारदेखि सुरू भएको प्रधानमन्त्री कप महिला राष्ट्रिय क्रिकेट २०८१ को दोस्रो खेलमा एपीएफ क्लबले फराकिलो जित निकालेको छ । एपीएफले कर्णाली प्रदेशलाई १११ रनले हराएको हो ।
एपीएफले दिएको १८३ रनको बलियो लक्ष्य पछ्याएको कर्णाली २० ओभरमा ७ विकेट गुमाएर ७१ रन मात्र बनाउन सक्यो । दिक्षा पुरीले सर्वाधिक १७ रन बनाइन् ।
एपीएफका लागि करुणा भण्डारीले ३ विकेट लिइन् भने रेखा रावल, सुमन विष्ट र बिनु बुढाले एक(एक विकेट लिए ।
त्यसअघि धनगढीस्थित फाप्ला क्रिकेट मैदानमा जारी खेलमा टस जितेर पहिले ब्याटिङ गरेको एपीएफले २० ओभरमा १ विकेट गुमाएर १८२ रन बनाएको थियो ।
एपीएफका लागि ओपनर ममता चौधरीले अविजित रहँदै ७८ रन बनाइन् भने कप्तान इन्दु बर्मा ५२ रनमा अविजित रहिन् । कर्णालीकी दिक्षा पुरीले एक विकेट लिइन् ।
एपीएफ महिला क्रिकेट प्रतियोगिताको डिफेन्डिङ च्याम्पियन पनि हो ।
यसअघि आजै भएको पहिलो खेलमा सुदूरपश्चिम प्रदेशले गण्डकी प्रदेशलाई हराएको थियो ।