सन्दीप लामिछानेविरुद्ध किशोरीले आफूमाथि दुईपटक जबरजस्ती करणी भएको दिइन् बयान

कात्तिक १४, काठमाडौं। क्रिकेटर सन्दीप लामिछानेविरुद्ध जबरजस्ती करणीको जाहेरी दिने किशोरीले आफूमाथि दुईपटक जबरजस्ती करणी भएको बयान दिएकी छिन् ।

प्रहरीमा दिएको जाहेरीमा किशोरीले घटनाको बेलिबिस्तार लगाउँदै आफूमाथि भदौ ५ गते राती दुईपटक जबरजस्ती करणी भएको बयान दिएकी छिन् । 

जाहेरीमा किशोरीले आफू निदाएको बेला आफूमाथि जबरजस्ती करणी भएको र पहिलो करणी भएको एक घण्टापछि पुनः आफूमाथि बलात्कार भएको आरोप लगाएकी छिन् । सन्दीपले आफूलाई नगरकोटमा पुराएर त्यहीँसमेत राख्न खोजेकामा आफू त्यहाँ बस्न अस्वीकार गरी गाडीबाट नओर्लिएपछि आफूलाई काठमाडौँ ल्याएर होटल काठमाडौँ इनको कोठा नम्बर ३०५ मा दुईपटक बलात्कार गरिएको बताएकी छिन् । 

पीडित किशोरीको उमेर १६ वर्षभन्दा माथि १८ वर्षभन्दा कम भएको कारण क्रिकेटर सन्दीप लामिछानेले जबरजस्ती करणी गरेको प्रमाणित भएको भन्दै आरोपित लामिछानेलाई १० देखि १२ वर्षसम्मको कैद सजाय र मनासिक  क्षतिपूर्तिको मागदाबी लिएर कात्तिक १४ गते सोमबार काठमाडौँ जिल्ला अदालतमा मुद्दा दायर भएको छ । मुद्दा दायर भएपछि मंगलबार नै सन्दीपको बयान लिई थुनछेक बहस सुरु हुने काठमाडौँ जिल्ला अदालतले बताएको छ ।