दिक्तेल रूपाकोट मझुवागढी नगरपालिकाले आङ खसेका महिलाको उपचार गर्दै

मंसिर ११, काठमाडौं ।गत आर्थिक वर्षबाट दिक्तेल रूपाकोट मझुवागढी नगरपालिकाले सुरु गरेको स्क्रिनिङ शिविरमा यस पटक आङ खसेको समस्या भएका ६२ जना महिलालाई पहिचान गरिएको हो ।

दिक्तेल रूपाकोट मझुवागढी नगरपालिका–१५ विजयखर्ककी ८० वर्षीया मनकुमारी (नाम परिवर्तन) ले आङ खस्ने पीडा खेपेको १२ वर्ष भयो । यसको उपचार हुन्छ भन्ने थाहा नभएकै कारण उनी पीडा लुकाएर बसेकी थिइन् । नगरपालिकाले सञ्चालन गरेको आङ खस्ने महिलाको स्क्रिनिङका बेला यस्तो समस्याको उपचार हुन्छ भन्ने थाहा भएपछि उनी उपचारमा लागेकी छन् ।
नगरपालिकाकै वडा नम्बर ६ नेर्पाकी ७४ वर्षीया अर्की एक महिलाले पनि यस्तो पीडा भोगेको दशक नाघ्यो । ६ बच्चालाई जन्म दिएपछि उनमा समस्या देखियो तर परिवारलाई भने भन्न सकेकी थिइनन् ।

नगरपालिकाको स्क्रिनिङ शिविरमा गरिएको काउन्सिलिङपछि उनमा पनि उपचार गर्ने आँट आएको छ । उनीहरूसहित ३६ जना आङ खसेका महिलाको बनेपास्थित शिर मेमोरियल अस्पतालमा उपचार सुरु भएको छ । सबैको शल्यक्रिया गर्नुपर्ने नगरपालिकाका स्वास्थ्य शाखा प्रमुख खेम आचार्यले बताए । उनीहरूलाई लाग्ने औषधि, शल्यक्रिया, कुरुवासहित खाना तथा यातायातको जोहो नगरपालिका र भक्तपुरस्थित सामुदायिक सेवा प्रतिष्ठानले मिलाएका हुन् ।

एक व्यक्ति बराबर करिब ७० हजार रुपैयाँ खर्च लाग्ने आचार्यको भनाइ छ । गत आर्थिक वर्षबाट नगरपालिकाले सुरु गरेको स्क्रिनिङ शिविरमा यस पटक आङ खसेको समस्या भएका ६२ जना महिलालाई पहिचान गरिएको हो । यसमध्ये पहिलो चरणमा मंसिर २ गते १६ जना र मंसिर ५ गते २० जनालाई बस चढाएर बनेपा पुर्‍याइएको नगर प्रमुख तीर्थराज भट्टराईले बताए ।

गत वर्ष २८ मध्ये २० जनाको शल्यक्रिया गरिएको थियो । आठ जनाको अन्य शारीरिक समस्याका कारण शल्यक्रिया गर्न सम्भव नभएको हलेसी तुवाचुङ नगरपालिकाका स्वास्थ्य शाखा प्रमुख प्रकाश घिमिरेले बताए । गत वर्ष आङ खसेका २० महिलाको शल्यक्रिया, औषधि उपचारलगायतमा नगरपालिकाको करिब दुई लाखको हाराहारीमा खर्च भएको थियो ।साभार कान्तिपुर