त्रिभुवन अन्तर्राष्ट्रिय विमानस्थलबाट ४ किलो गाँजासहित दुई भारतीय महिला पक्राउ

साउन ७, काठमाडौं। लागूऔषध नियन्त्रण ब्युरोले त्रिभुवन अन्तर्राष्ट्रिय विमानस्थलबाट करिब चार किलोग्राम गाँजासहित दुई जना भारतीय महिलालाई पक्राउ गरेको छ। अन्तर्राष्ट्रिय उडानमार्फत नेपाल आएका उनीहरूलाई नियमित सुरक्षा जाँचका क्रममा लागूऔषधसहित नियन्त्रणमा लिइएको प्रहरीले जनाएको छ।
पक्राउ पर्नेमा भारतका बिस वर्षीया मोना देवी लोन्जाम र २३ वर्षीया ओइनाम एली रहेका छन्। उनीहरू थाइल्यान्डको बैंककबाट थाई एयरवेजको उडानमार्फत काठमाडौं आइपुगेका थिए।
लागूऔषध नियन्त्रण ब्युरोका अनुसार विमानस्थलमा गरिएको नियमित सुरक्षा तथा शंकास्पद सामानको परीक्षणका क्रममा दुवै महिलाले बोकेका सुटकेसमा लुकाएर राखिएको करिब चार किलोग्राम गाँजा फेला परेको थियो। त्यसपछि उनीहरूलाई तत्काल नियन्त्रणमा लिई थप अनुसन्धान सुरु गरिएको हो।
प्रहरीले पक्राउ परेका दुवै महिलाको साथबाट राहदानी (पासपोर्ट), मोबाइल फोन तथा घटनासँग सम्बन्धित अन्य सामग्रीसमेत जफत गरेको जनाएको छ। बरामद लागूऔषध कहाँबाट ल्याइएको थियो, यसको अन्तिम गन्तव्य कहाँ थियो तथा यसमा अन्तर्राष्ट्रिय लागूऔषध तस्करी सञ्जालको संलग्नता छ वा छैन भन्ने विषयमा अनुसन्धान केन्द्रित गरिएको छ । 
प्रहरीका अनुसार पछिल्ला समय अन्तर्राष्ट्रिय विमानस्थलमार्फत विभिन्न किसिमका लागूऔषध ओसारपसारका प्रयास बढ्दै गएको देखिएकाले सुरक्षा निगरानी थप कडा बनाइएको छ। यस क्रममा यात्रुको सामानमा आधुनिक उपकरणमार्फत जाँच गर्ने, जोखिमयुक्त उडान तथा शंकास्पद गतिविधिमाथि विशेष निगरानी राख्ने कार्यलाई निरन्तरता दिइएको छ । 
लागूऔषध नियन्त्रण ब्युरोले पक्राउ परेका दुवै महिलाविरुद्ध लागूऔषधसम्बन्धी कसुरमा आवश्यक कानुनी प्रक्रिया अघि बढाइएको जनाएको छ। साथै, घटनामा अन्य व्यक्ति वा संगठित गिरोहको संलग्नता भए–नभएको विषयमा पनि अनुसन्धान जारी रहेको प्रहरीले जानकारी दिएको छ ।