तेस्रो सन्तान जन्माउने महिला कर्मचारीलाई तमिलनाडुमा अब ३६५ दिन प्रसूति बिदा

भदौ ३ , काठमाडौं । तमिलनाडु सरकारले तेस्रो सन्तान जन्माउने महिला सरकारी कर्मचारीलाई दिइँदै आएको प्रसूति बिदा १२ साताबाट बढाएर ३६५ दिन पुर्‍याउने घोषणा गरेको छ। अब पहिलो र दोस्रो सन्तान जन्माउँदा पाउने अवधिसरह तेस्रो सन्तानका लागि पनि एक वर्षसम्म प्रसूति बिदा उपलब्ध हुनेछ।
राज्यका मानव संसाधन व्यवस्थापनमन्त्री डी। सारतकुमारले मंगलबार विधानसभा बैठकमा विभागीय बजेटमाथिको छलफलका क्रममा उक्त घोषणा गरेका हुन्। उनले सरकार सामाजिक कल्याण र महिला सशक्तीकरणलाई प्राथमिकता दिने भएकाले तेस्रो सन्तानका लागि दिइँदै आएको प्रसूति बिदा १२ साताबाट बढाएर ३६५ दिन बनाइएको बताए।
हाल दुईभन्दा कम जीवित सन्तान भएका विवाहित महिला सरकारी कर्मचारीले ३६५ दिनसम्म प्रसूति बिदा पाउँदै आएका छन्। दुई वा सोभन्दा बढी जीवित सन्तान भएका महिला कर्मचारीका लागि भने हालसम्म अधिकतम १२ साताको बिदाको व्यवस्था थियो।
तमिलनाडुमा प्रसूति बिदाको अवधि क्रमशः बढाइएको इतिहास छ। सुरुमा ९० दिन रहेको प्रसूति बिदा सन् २०११ मा ६ महिना, २०१६ मा ९ महिना र २०२१ को जुलाईमा बढाएर ३६५ दिन पुर्‍याइएको थियो।
सरकारी स्रोतका अनुसार नियमित महिला कर्मचारीमध्ये दुईभन्दा कम जीवित सन्तान भएका कर्मचारीले ३६५ दिनको सुविधा पाउने व्यवस्था कायम रहनेछ। सर्वोच्च अदालतका निर्देशन र त्यसपछिका राज्यस्तरीय संशोधनअनुसार दुई वा सोभन्दा बढी जीवित सन्तान भएका महिला सरकारी कर्मचारीले भने पूर्ण तलबसहित १२ साताको प्रसूति बिदा पाउँदै आएका छन्।