बाढीपीडितका लागि कांग्रेस सांसदहरूले आधा महिनाको तलब दिने

भदौ १५ , काठमाडौं । प्रमुख प्रतिपक्षी दल नेपाली कांग्रेसले भोटेकोशी बाढी–पहिरो पीडितको सहयोगार्थ आफ्ना सांसदहरूको आधा महिनाको पारिश्रमिक पार्टीको राहत कोषमा जम्मा गर्ने निर्णय गरेको छ।

सोमबार सिंहदरबारमा बसेको संसदीय दलको बैठकपछि प्रमुख सचेतक बासना थापाले प्राकृतिक विपत्तिबाट भएको क्षतिप्रति दुःख व्यक्त गर्दै राहत तथा पुनःस्थापनाका लागि सांसदहरूको पारिश्रमिक सहयोग गर्ने निर्णय गरिएको जानकारी दिइन्।

बैठकमा बाढी–पहिरो प्रभावित क्षेत्रको स्थलगत अनुगमनबाट फर्किएका नेता तथा सांसदहरूले त्यहाँको अवस्थाबारे जानकारी गराएका थिए। बैठकले विपद्मा ज्यान गुमाएकाहरूप्रति श्रद्धाञ्जली व्यक्त गर्दै संसद्को अधिवेशन तत्काल सञ्चालन गर्नुपर्नेमा जोड दिएको छ।

प्रमुख सचेतक थापाका अनुसार संसद् सञ्चालन भए जनताका समस्या सरकारसमक्ष प्रभावकारी रूपमा पुर्‍याउन तथा बेपत्ता व्यक्तिको खोजीका लागि जिल्लास्तरबाट आवश्यक सूचना संकलन गर्न सहज हुनेछ। यस विषयमा सभामुखसँग समेत छलफल गरिने उनले बताइन्।

कांग्रेसले आफ्ना सांसदहरूलाई प्रभावित क्षेत्रमा जाँदा उद्धार तथा राहत कार्यमा बाधा नपुग्ने गरी, भीडभाड नगरी र आवश्यक समन्वय गरेर मात्र जान निर्देशन दिएको छ।

थापाले राहत संकलनमा ‘एकद्वार प्रणाली’ प्रभावकारी देखिए पनि राहत वितरणमा भने समस्या रहेको बताइन्। क्षतिको वास्तविक विवरण र कुन परिवारलाई कस्तो सहयोग आवश्यक छ भन्ने जानकारी स्थानीय तहसँग हुने भएकाले राहत वितरण तथा तथ्याङ्क संकलनको जिम्मेवारी स्थानीय र प्रदेश सरकारलाई दिनुपर्ने उनको भनाइ छ।