अष्ट्रेलियाली टेनिसकी उदाउँदो खेलाडी टेलाह प्रेस्टन: बाल्यकालको सपना पूरा गर्दै विश्व मञ्चतर्फ

भदौ ३ , काठमाडौं । अष्ट्रेलियाली महिला टेनिसकी  खेलाडी टेलाह प्रेस्टनले विश्व टेनिसमा आफ्नो अलग पहिचान बनाउन थालेकी छन्। तीन पटक अष्ट्रेलियन टेनिस अवार्डअन्तर्गत ‘फिमेल जुनियर एथ्लेट अफ द इयर’ घोषित भइसकेकी २० वर्षीया प्रेस्टनलाई महिला टेनिसको भविष्यका रूपमा हेरिएको छ।
पश्चिमी अष्ट्रेलियाको पर्थमा जन्मिएकी प्रेस्टनले चार वर्षको उमेरमा पहिलो पटक टेनिस र्याकेट समातेकी थिइन्। ग्रिनउड टेनिस क्लबबाट सुरु भएको उनको यात्रा अहिले डब्लुटीए टुरसम्म पुगेको छ।
सन् २०२६ उनको करिअरका लागि विशेष बन्यो। जनवरीमा आयोजित होबार्ट इन्टरनेसनल प्रतियोगिताको सेमिफाइनलमा पुगेर उनले आफ्नो क्षमता प्रमाणित गरिन्। त्यसपछि अष्ट्रेलियन ओपन २०२६ मा वाइल्डकार्डमार्फत मुख्य चरणमा स्थान बनाउँदै उनले ग्रान्ड स्लामको मुख्य चरणमा पहिलो जित दर्ता गरिन्।
प्रतियोगितामा उनले उत्कृष्ट प्रदर्शन गरे पनि अन्ततः विम्बल्डन उपाधिकी बलियो दाबेदार लिन्डा नोस्कोभासँग तीन सेटको प्रतिस्पर्धात्मक खेलमा पराजित भइन्। तर, उनको साहसी खेलशैली र निरन्तर सुधारले टेनिस विश्लेषकहरूको ध्यान आकर्षित गरिरहेको छ।
प्रेस्टनका अनुसार बाल्यकालमा उनका बुबाले स्थानीय विद्यालयको कोर्टमा नियमित अभ्यास गराउन लैजान्थे। यही वातावरणले उनलाई टेनिसप्रति आकर्षित बनाएको थियो। उनले आफ्नो प्रेरणाको स्रोतका रूपमा रुसी खेलाडी मारिया सारापोभा र अष्ट्रेलियाकी पूर्व नम्बर एक खेलाडी एश बार्टीलाई उल्लेख गरेकी छन्।
उनको पहिलो र्याकेट विल्सन कम्पनीको थियो, जुन अहिले पनि घरमा सुरक्षित रहेको उनले बताएकी छन्।
प्रेस्टनका लागि सबैभन्दा अविस्मरणीय क्षण भनेको ब्रिस्बेनमा अष्ट्रेलियाको प्रतिनिधित्व गर्दै बिली जिन किङ कपमा डेब्यु गर्नु हो। पहिलो खेलमै जित हासिल गरेकाले त्यो अनुभव अझ विशेष बनेको उनी बताउँछिन्।
उनले अष्ट्रेलियन ओपनलाई आफ्नो मनपर्ने प्रतियोगिताका रूपमा वर्णन गरेकी छन्। आफ्नै देशमा बसेर विश्वकै प्रतिष्ठित प्रतियोगितामा सहभागी हुन पाउनु गौरवको विषय भएको उनको भनाइ छ।
प्रेस्टनले टेनिसले आफूलाई खेल मात्र नभई जीवनका धेरै पाठ सिकाएको बताएकी छन्। सानै उमेरदेखि स्वतन्त्र बन्न, कडा मेहनत गर्न र विभिन्न परिस्थितिसँग जुध्न टेनिसले महत्त्वपूर्ण भूमिका खेलेको उनको अनुभव छ।
टेनिसकै कारण संसारका विभिन्न देश घुम्ने अवसर प्राप्त भएको र आफ्ना धेरै घनिष्ठ साथीहरू पनि यही खेलमार्फत भेटिएको भन्दै उनले खेलले आफ्नो जीवनलाई पूर्ण रूपमा परिवर्तन गरेको बताएकी छन्।