स्वास्थ्यकर्मी महिलामाथि मध्यरातमा डिउटी रहेका बेला हातपात

पुस १३, कपिलवस्तु । कपिलवस्तुको शिवराज नगरपालिका वडा नं। ११ मा रहेको थुन्हिया स्वास्थ्य चौकीको वर्थिङ्ग सेन्टरमा कार्यरत अनमी उषा केसीमाथि हातपात भएको छ । रात्रीकालिन सिफ्टमा डिउटीमा रहेकी केसीको कुटपिटबाट बायाँ हात समेत भाँचिएको छ ।मंगलबार राती करिब ११ बजे स्थानीय मोहबुज मुसलमानले स्वास्थ्य चौकीको ढोका फोरेर आफूमाथि हातपात गरेको केसीले बताइन् ।

मुसलमानले आफूमाथि गलत नियतले व्यवहार गर्दै आएको भन्दै ३्/४ दिन अघि नै वडा अध्यक्ष रामेश्वर बर्मालाई जानकारी गराएको भए पनि वडा अध्यक्षले आफ्नो कुरा गम्भीर रुपमा नलिएका कारण यस्तो हिंसात्मक घटना घटाएको उनले बताइन् । अबेर राती ढोका ढक्ढकाएको आवाज आएपछि आफूले वडा अध्यक्षलाई फोन गरी खबर गरेको भए पनि करिब आधा घण्टापछि मात्रै स्थानीय र अध्यक्ष आएको उनले बताइन् ।

शिवराज नगरपालिकामा कार्यरत सम्पूर्ण कर्मचारीले बुधबार प्रदर्शन गरेको विरोध जुलुस ।केसीलाई कुटपिट गरी फरार रहेका मुसलमानलाई थुन्हियाको बनढिहवाबाट पक्राउ गरिएको वडा प्रहरी कार्यालय चन्द्रौटाले जनाएको छ । पीडित पक्षको जाहेरीका आधारमा कानून बमोजिम कारबाही गरिने वडा प्रहरी कार्यालय चन्द्रौटाले जनाएको छ । यता अनमी केसीमाथि भएको कुटपिटको विरोधमा शिवराज नगरपालिकामा कार्यरत सम्पूर्ण कर्मचारीले बुधबार विरोध जनाएका छन् ।

कर्मचारीले वडा नं। ५ को सभाहलमा विरोधसभाको आयोजना गरी कर्मचारीहरुको सुरक्षाको ग्यारेन्टी हुनु पर्ने भन्दै पीडकलाई कानुन बमोजिम कारवाही हुनु पर्ने माग गरेका छन् । थुन्हिया स्वास्थ्य चौकीमा रहेको वर्थिङ्ग सेन्टर अर्को व्यवस्था नहुन्जेलसम्म बन्द रहने र सम्पूर्ण प्राविधीकलाई चनई स्वास्थ्य चौकीबाट सेवा प्रवाह गरिने शिवराज स्वास्थ्य शाखा प्रमुख विष्णु क्षेत्रीले बताए ।    महिला खबर