प्रधानमन्त्री कप इन्डो–नेपाल भलिबल प्रतियोगितामा सशस्त्र प्रहरीको विजयी सुरुवात

काठमाडौं। प्रधानमन्त्री कप इन्डो–नेपाल भलिबल प्रतियोगिताको चौथो संस्करणमा सशस्त्र प्रहरीको एपीएफ क्लब र भारतीय रेल्वे टिम कलकत्ताले विजयी सुरुवात गरेका छन् । नेपालगन्ज रंगशालास्थित कर्बड हलमा शनिवार सुरु प्रतियोगितामा एपीएफले भारतको बर्षात एशोसीयसन क्लबलाई २५–१७, २५–५ र २५–६ को सोझो सेटमा हराएको छ । नेपाली राष्ट्रिय टिमका सरस्वती चौधरी, रेश्मा भण्डारीलगायतका चर्चित खेलाडीहरु रहेको एपीएफ सामु भारतीय टिमले निकै कमजोर प्रदर्शन गर्‍यो ।

भएको अर्को खेलमा रेल्वे टिम कलकत्ताले नेपाल प्रहरीलाई २५–१३, २५–१६ र २५–१४ को सोझो सेटमा निराश पार्‍यो । गत बर्षको विजेता रेल्वेका अगाडी नयॉ खेलाडीसहित नेपालगन्ज आएको नेपाल प्रहरी कमजोर देखियो । पराजित नेपाल पुलिस क्लबकी कप्तान कोपिला उप्रेती नयाँ खेलाडी सहितको टिम आएकाले तालमेल मिलाउन नसक्दा प्रदर्शन कमजोर भएको बताईन् । ‘पहिलो सेट राम्रो खेल्न सकेनौ । दोस्रो सेटमा लय पक्डिदैथियौं। तेस्रो सेट नयाँ खेलाडी नर्भस भइदिंदा हारियो,’ उनले भनिन् ।

रेल्वे टिमकी कप्तान आरुसी घोषले पीएम कपको सुरुवात आशा गरेझै राम्रोसंग भएको प्रतिक्रिया दिईन् । ‘हामी जित्नै आएको हो’ साविक बिजेता टिमकी उनले भनिन्–सकेसम्म राम्रो प्रदर्शन गरेर जित्ने हो । रेलवेकी प्रशिक्षक दिप्ती घोषले भने डिफेन्डिङ च्याम्पियन भए पनि आफूले नै जित्ने ग्यारेन्टी अहिल्यै गर्न नसकिने बताईन् । उनको टिममा प्रिती सिंह र अरुसी घोष भारतीय महिला भलिबल टोलीका सदस्य हुन् । प्रशिक्षक दिप्ती आफै पनि टोलीको पुर्वखेलाडी हुन ।

युवा तथा खेलकुद्मन्त्री दलजीत श्रीर्पालीले प्रतियोगिताको उद्घाटन गर्दै प्रधानमन्त्री कपले भलिबल खेलको स्तरउन्नती गर्न सघाएको बताएका छन् । उनले प्रधानमन्त्री कप संचालन गर्न आर्थिक समस्या नपर्ने गरी सरकारले सहयोग गर्ने प्रतिबद्धता पनि जनाए ।

नेपालका विभागिय तीन, भारतका दुई र स्थानीय मध्यपश्चिमक टिम गरी ६ टोलीले प्रतियोगितामा भाग लिदैछन् । गत बर्ष सहभागी रहेका न्यू डाइमण्ड क्लब र पोखरा भने यसपटक सहभागी छैनन । प्रतियोगिताको अवसरमा नेपाली राष्ट्रिय क्रिकेट टोलीका ओपनर खेलाडी महेश क्षेत्रीलाई मन्त्री श्रीपालीले सम्मान पनि गरे । उनी प्रधानमन्त्री कपका सद्भावना दूत पनि हुन् । प्रतियोगिता फागुनको १८ गतेसम्म चल्ने आयोजक भलिबल संघका अध्यक्ष टीएस ठकुरीले बताए । लिगकम नकआउटको आधारमा हुने प्रतियोगिताको विजेताले १ लाख ११ हजार, दोस्रोले ५५ हजार रुपैयाँ, तेस्रोले ३५ हजार रुपैयाँ प्राप्त गर्नेछन् ।

प्रतियोगिताको सर्वोत्कृष्ट खेलाडी, उत्कृष्ट स्पाईकर, उत्कृष्ट ब्लकर, उत्कृष्ट सेटर, उत्कृष्ट ब्लकर, उत्कृष्ट रक्षक, उत्कृष्ट सर्भरलाई आर्कषक पुरस्कार प्रदान दगरिने ठकुरीले बताए । आजको  खेल रेल्वे टिम र स्थानीय मध्यपश्चिमबीच हुनेछ । त्यस्तै, अर्को खेल बर्षात एशोसियसन र त्रिभुवन आर्मी क्लबबीच हुने आयोजकले जनाएको छ ।