७ फिट ३ इन्चकी झाङले महिला बास्केटबल विश्वकपमा मच्चाइन् चर्चा

भदौ २२, काठमाडौं । चीनकी १९ वर्षीया बास्केटबल खेलाडी झाङ जियुले महिला बास्केटबल विश्वकपमा डेब्यु गरेसँगै विश्वभर चर्चा बटुलेकी छन्।

करिब ७ फिट ३ इन्च (२.२१ मिटर) अग्ली झाङले शुक्रबार अमेरिकाविरुद्धको खेलबाट विश्वकपमा डेब्यु गरेकी हुन्। खेलमा चीन अमेरिकासँग ९४–६१ ले पराजित भए पनि झाङले आफ्नो शारीरिक उपस्थितिसँगै अमेरिकी टोलीलाई चुनौती दिइन्।

झाङले १८ मिनेट कोर्टमा बिताउँदै १३ अंक जोडिन्, जसमध्ये ९ अंक फ्रि–थ्रोबाट आएको थियो। उनको उचाइका कारण अमेरिकी टोलीले बास्केटनजिक उनको प्रभाव रोक्न विशेष रणनीति अपनाएको थियो।

अमेरिकी प्रशिक्षक कारा लसनले झाङलाई बास्केटनजिक बल पाएपछि रोक्न कठिन हुने बताउँदै उनको भविष्यमा ठूलो सम्भावना रहेको उल्लेख गरेकी छन्। उनका अनुसार यति कम उमेरमै विश्वकपमा शीर्ष खेलाडीविरुद्ध खेल्नु झाङको विकासका लागि महत्वपूर्ण अनुभव हो।

झाङका लागि विशेष प्रशिक्षण व्यवस्था समेत गरिएको छ। उनको शारीरिक बनोटलाई ध्यानमा राख्दै टोलीका अन्य खेलाडीभन्दा फरक अभ्यास र वार्मअप कार्यक्रम तयार गरिएको चिनियाँ प्रशिक्षक गोङ लुमिङले बताएका छन्।

झाङले गत वर्ष महिला एसिया कपमा चीनको सिनियर टोलीबाट डेब्यु गरेकी थिइन्। उक्त प्रतियोगितामा उनले औसत १४।८ अंक र ५।५ रिबाउन्ड गरेकी थिइन्। उनका दुवै अभिभावक पनि बास्केटबल खेलाडी रहेका र आमाकै प्रेरणाबाट उनले यो खेल सुरु गरेको एपीले जनाएको छ।

महिला बास्केटबल विश्वकपमा उनको पहिलो खेलले भने चीनलाई नयाँ सम्भावनायुक्त खेलाडी थपिएको संकेत गरेको छ। चीनले प्रतियोगिताको अर्को खेलमा चेक गणतन्त्रसँग प्रतिस्पर्धा गर्नेछ।