१६ वर्षीया किशोरीमाथि सामूहिक बलात्कार: दिल्ली प्रहरीले दुई साताभित्र अभियोगपत्र दायर

भदौ १७ , काठमाडौं । भारतको दिल्लीमा १६ वर्षीया किशोरीमाथि बस चालक र सहचालकले कथित रूपमा सामूहिक बलात्कार गरेको घटनामा प्रहरीले अनुसन्धान तीव्र बनाएको छ। प्रहरीले घटनामा प्रयोग भएको बसबाट पीडिताको कपाललगायत जैविक नमुना संकलन गरेको छ भने विभिन्न व्यक्तिका बयान र सीसीटीभी फुटेजलाई प्रमाणका रूपमा संकलन गरेको जनाएको छ।

प्रहरीका अनुसार घटनासँग सम्बन्धित फरेन्सिक रिपोर्ट छिटो उपलब्ध गराउन फरेन्सिक साइन्स ल्याबोरेटरी ९एफएसएल० लाई आग्रह गरिएको छ। अभियोगपत्रमा यी प्रमाण महत्वपूर्ण हुने प्रहरी अधिकारीहरूले बताएका छन्। अनुसन्धान पूरा गरी दुई साताभित्र अभियोगपत्र दायर गर्ने तयारी भइरहेको छ।

प्रहरीका अनुसार उत्तर प्रदेशको मैनपुरीकी कक्षा ११ मा अध्ययनरत किशोरी अगस्ट ३ मा घरबाट निस्किएकी थिइन्। नोएडाको सेक्टर–६३ मा आफन्तको घर जाने क्रममा उनलाई ग्रेटर नोएडाको परी चोकबाट बस चालक र सहचालकले बसमा चढाएको बताइएको छ।

प्रहरीका अनुसार उक्त बसले परी चोकदेखि कश्मीरी गेट क्षेत्रसम्म करिब ४७ किलोमिटर यात्रा गरेको थियो। अगस्ट ४ को बिहान किशोरीलाई कश्मीरी गेट नजिकै झारिएको थियो। बसका झ्यालमा पर्दा रहेकाले बाहिरबाट भित्रको गतिविधि देख्न कठिन रहेको प्रहरीले जनाएको छ।

अनुसन्धानका क्रममा प्रहरीले परी चोकमा किशोरी बसमा चढेको र कश्मीरी गेट क्षेत्रमा उनलाई झारिएको देखिने दुईवटा सीसीटीभी फुटेज फेला पारेको छ। बसको डीभीआरसमेत प्रहरीले नियन्त्रणमा लिएर प्रमाणका रूपमा सुरक्षित गरेको जनाएको छ।

यसैबीच, राष्ट्रिय मानव अधिकार आयोगले घटनालाई गम्भीर मानव अधिकार उल्लंघनको विषय भन्दै दिल्ली र गौतम बुद्धनगरका प्रहरी आयुक्त तथा मैनपुरीका प्रहरी अधीक्षकलाई नोटिस पठाएको छ। आयोगले दुई साताभित्र अनुसन्धानको अवस्था र पीडितलाई उपलब्ध गराइएको क्षतिपूर्तिसहितको विस्तृत प्रतिवेदन माग गरेको छ।

घटनापछि किशोरीले कश्मीरी गेट प्रहरी कार्यालयमा उजुरी दिएपछि सामूहिक बलात्कार तथा बालबालिकामाथि यौन अपराधसम्बन्धी कानुनअन्तर्गत मुद्दा दर्ता गरिएको थियो। सीसीटीभी फुटेजका आधारमा प्रहरीले बसलाई तिमारपुरको पार्किङ क्षेत्रमा फेला पारी चार घण्टाभित्रै चालक र सहचालकलाई पक्राउ गरेको जनाएको छ।