असार १९, सुर्खेत । वीरेन्द्रनगर नगरपालिकाले चार वर्षभित्र प्रत्येक घरका कम्तीमा एक जना महिलालाई रोजगारी दिने कार्यक्रम सार्वजनिक गरेको छ ।
‘समृद्ध वीरेन्द्रनगरको आधारः एक घर एक महिला रोजगार’ कार्यक्रम अन्तरगत नगरपालिकाले महिलालाई स्वरोजगार बनाउन लागेको हो ।
नगरपालिकाले महिलाहरुलाई व्यवसायका आधारमा ५० प्रतिशत विना व्याज ऋण र ५० प्रतिशत अनुदान दिनेछ । यस अन्तरगत पहिलो वर्षका लागि एक करोड ८० लाख रुपैयाँ छुट्याएको नगरपालिकाका उपमेयर मोहनमाया ढकालले जानकारी दिइन् ।
पहिलो वर्ष सिमान्तकृत महिलालाई यो कार्यक्रममा समेटिने छ । उपमेयर ढकालले भनिन्, ‘चार वर्षभित्र नगरभित्रका प्रत्येक घरका कम्तिमा पनि एक जना महिलालाई स्वरोजगार बनाउँछौं ।’
बेरोजगार महिलाहरुको लगत संकलनको काम भइरहेको छ । बेरोजगार महिलालाई उनीहरुको योग्यता र क्षमताको आधारमा रुचि अनुसारको सीप विकास तालिम दिएर स्वरोजगार बनाउने लक्ष्य नगरपालिकाको रहेको उपमेयर ढकालले बताइन् ।
कर्णाली प्रदेशको राजधानी समेत रहेको वीरेन्द्रनगर नगरपालिकामार्फत एक करोड र वडामार्फत ८० लाख रुपैयाँ महिला रोजगार कार्यक्रमका लागि छुट्याएको छ ।
यो कार्यक्रम अन्तरगत सीप विकास तालिमपछिको व्यवसाय गर्नका लागि ४० हजार विना व्याजको ऋण र २० हजार रुपैयाँ नगरपालिकाले अनुदान दिने छ ।
उपमेयर ढकालका अनुसार महिला स्वरोजगार सम्बन्धी नगरपालिकाभित्र काम गर्ने संघ–संस्थालाई एकद्धार प्रणालीमा ल्याएर उनीहरुको लगानी पनि यसमा थपिनेछ । पहिलो वर्ष कम्तिमा पनि पाँच हजार महिलालाई स्वरोजगार बनाउने लक्ष्य रहेको पनि उनले बताइन् ।
२३ हजार सात सय १० घरधूरी रहेको वीरेन्द्रनगर नगरपालिकाभित्र नगरपालिकाले अघिल्लो वर्ष सुरु गरिएका महिला लक्षित कार्यक्रम प्रभावकारी भएकाले महिलामैत्री बजेट ल्याइएको बताएको छ ।
चालू आर्थिक वर्षमा सुरु गरिएको छोरी जन्म बचत खाता, सुरक्षित आमा कार्यक्रम, गर्भवती महिलाका लागि निःशुल्क भिडियो एक्सरे, हिंसापीडित महिलाहरुका लागि निःशुल्क उपचारलगायतका कार्यक्रमलाई आगामी आर्थिक वर्षमा पनि निरन्तरता दिइएको छ ।
नगरपालिकाले महिलाका नाममा सम्पत्ति प्राप्त हुने सिफारिस र प्रमाणित शुल्क दस्तुरमा ३५ प्रतिशत छुट दिने निर्णय गरेको छ । यस्तै महिला, दलित तथा अपाङ्गता भएका व्यक्ति तथा समूहद्धार सञ्चालित व्यवसायमा २० प्रतिशत कर छुटको व्यवस्था गर्ने नगरपालिकाले निर्णय गरेको छ ।
यस्तै नगरपालिकाले गर्भवती महिलालाई सुत्केरी हुनका लागि नजिकको बर्थिङ सेन्टर र क्षेत्रीय अस्पताल कालागाउँसम्म पुर्याउनका लागि एम्बुलेन्समा लाग्ने खर्च व्यहोर्ने निर्णय गरेको छ । यसका लागि नगरपालिकाले २० लाख रुपैयाँ छुट्याएको छ ।
नगरपालिकाको शुक्रबार पारित भएको बजेटमा कटकुवा स्थास्थ्य चौकीलाई महिला तथा बालबालिका विशेषज्ञ अस्पतालको रुपमा विकास गर्ने उल्लेख छ ।
यस्तै महिला स्वयमसेविकाको पोशाक भत्तालाई एक हजारबाट बढाएर दुई हजार पुर्याइएको छ ।
गर्भवती महिलालाई निःशुल्क भिडियो एक्सरे सेवालाई निरन्तरता दिइएको छ ।