एमाले कार्यदलको साझा प्रतिवेदन तयार, नेतृत्व परिवर्तनको विषय बाहिरै

असोज ४, काठमाडौं ।  नेकपा (एमाले) को पार्टी पुनर्गठन तथा निर्वाचन समीक्षासम्बन्धी कार्यदलले विभिन्न विषयमा आएका मस्यौदालाई एकीकृत गरी सर्वसम्मत प्रतिवेदन तयार गरेको छ।

कार्यदलले तयार पारेको उक्त प्रतिवेदन अब केन्द्रीय सचिवालयमा पेस गर्ने निर्णय गरेको एमाले सचिव पद्मा अर्यालले जानकारी दिनुभयो। उहाँका अनुसार कार्यदलमा छुट्टाछुट्टै तीनवटा प्रतिवेदन तयार भएको नभई विभिन्न कोणबाट आएका विषयगत मस्यौदा मात्र रहेको थियो।

कार्यदलको बैठकमा संयोजकले प्रस्तुत गरेको मस्यौदामाथि छलफल गरी आवश्यक थपघट गरिएको र त्यसपछि साझा प्रतिवेदनलाई सर्वसम्मत रूपमा पारित गरिएको अर्यालले बताउनुभयो।

बैठकमा पार्टीलाई थप एकताबद्ध बनाएर अघि बढाउने विषयमा छलफल भएको थियो। प्रतिवेदनमा समेट्नुपर्ने विभिन्न विषय र तिनका पक्षबारे पनि कार्यदलमा विस्तृत छलफल भएको जनाइएको छ।

तर पार्टी पुनर्गठनका क्रममा नेतृत्व परिवर्तन वा नेतृत्व पुनर्गठनको विषय भने प्रतिवेदनमा समावेश नगरिएको सचिव अर्यालले स्पष्ट पार्नुभयो। उहाँका अनुसार कार्यदलले नेतृत्व पुनर्गठनसँग सम्बन्धित कुनै पनि विषय सचिवालयमा पेस गर्ने प्रतिवेदनमा समेटेको छैन।

अब कार्यदलको साझा प्रतिवेदन केन्द्रीय सचिवालयमा पेस गरिनेछ। त्यसपछि पार्टीको सम्बन्धित तहबाट प्रतिवेदनमा समेटिएका विषयमाथि आवश्यक निर्णय तथा प्रक्रिया अघि बढाइनेछ।