सुस्त मनस्थितिकी युवती बलात्कृत

पुस ५, पाँचथर । पाँचथरको फाल्गुनन्द गाउँपालिकामा एक सुस्त मनस्थितिकी युवती बलात्कृत भएकी छन् । बलात्कारका आरोपितलाई प्रहरीले पक्राउ गरेको छ ।

गत मंसिर २८ गते साँझ घरमा परिवारका अन्य कोही पनि सदस्य नभएको मौका छोपी सुस्त मनस्थितिकी युवतीलाई बलात्कार गरेको आरोपमा फाल्गुनन्द गाउँपालिका वडा नं। २ का लाले भनिने शुरेस भुजेल पक्राउ परेका हुन् ।

पीडितका आफन्तका अनुसार सुस्त मनस्थितिकी ती युवतीलाई घरमा एक्लै छाडेर परिवारका अन्य सबै सदस्य विवाहमा गएका थिए ।

युवतीलाई ललाई फकाई घरभन्दा केही पर लगेर भुजेलले बलात्कार गरेको पीडितले इशारा मार्फत आफन्तलाई बताएकी छन् । जन्मजात देख्न र सुन्न सक्ने भए पनि ती युवती बोल्न भने सक्दिनन् ।

उनले आफन्तलाई पीडकले हातमा समाई गाउँमा लैजाने भनेर एकान्तमा लगेर करणी गरेको इशारा मार्फत बताएकी छन् ।

बलात्कारका आरोपित भुजेललाई पुष १ गते पक्राउ गरिएको जिल्ला प्रहरी कार्यालय पाँचथरका प्रहरी निरीक्षक अनिलकुमार पौडेलले जानकारी दिए ।

घटना बारे थप अनुसन्धानका लागि पीडकलाई पाँचथर जिल्ला अदालतबाट म्याद थप गरी जबरजस्ती करणी महल अन्तर्गत मुद्दा दर्ता गरी अनुसन्धान प्रकृया अघि बढाइएको जिल्ला प्रहरी कार्यालय पाँचथरले जनाएको छ । –महिला खबर