यू-१९ महिला विश्वकप क्रिकेट स् नेपाल समूह चरणमा अंकविहीन

माघ ९, काठमाडौं । नेपाल अंकविहीन हुँदै यू(१९ महिला विश्वकप क्रिकेटबाट बाहिरिएको छ । लिग चरणको आफ्नो अन्तिम खेलमा बुधबार अस्ट्रेलियासँग ८३ रनले पराजित हुँदै नेपाल समूह चरणमै रोकिएको हो । नेपाल यसअघि बंगलादेश र स्कटल्यान्डसँग पराजित भएको थियो ।  

मलेसियाको युकेएम क्रिकेट ओभलमा अस्ट्रेलियाले दिएको १४० रनको उच्च लक्ष्य पछ्याएको नेपालले निर्धारित ओभरमा ८ विकेट गुमाएर ५६ रनमात्र बनाउन सक्यो ।  

ओपनरद्वय साना प्रविन र सावित्री धामीले दोहोरो अंकका स्कोर गर्न सकेनन् । ११औं ओभरमा २८ रन जोड्दा तीन विकेट गुमाएको स्थिति सम्हाल्दै क्याप्टेन पूजा महतो र सिमाना केसीले चौथो विकेटका लागि १५ रनको साझेदारी गरेपनि जितका लागि पर्याप्त हुन सकेन । पूजाले १८ रन बनाउनु बाहेक अन्य कुनै ब्याटरले दोहोरो अंकको स्कोर गर्न सकेनन् । 

यसअघि टस जितेर पहिला ब्याटिङ गरेको अस्ट्रेलियाले निर्धारित ओभरमा ६ विकेट गुमाएर १३९ रन बनाएको थियो ।

१४ रन जोड्दा ३ विकेट गुमाएको स्थिति सम्हाल्दै केमी ब्रे र लियोनर लारोसाले चौथो विकेटका लागि ७२ रनको साझेदारी गरे । केमी ४५ रनमा रिया शर्माको बलमा सिमाना केसीद्वारा क्याच आउट भइन् । लियोनरले ३१ रन बनाइन् भने हसरत गिल ३० र क्लोइ एन्सवर्थ १६ रनमा नटआउट रहे ।  

नेपालका लागि क्याप्टेन पूजा महतोले ३ विकेट लिइन् । सिमाना केसीले दुई र रिया शर्माले एक विकेट लिइन् ।  

समूह डीबाट अस्ट्रेलिया विजेता र बंगलादेश उपविजेता बन्दै सुपर सिक्समा प्रवेश गरेका छन् । अस्ट्रेलियाको ६ र बंगलादेशको ४ अंक रह्यो । २ अंक भएको स्कटल्यान्ड पनि सुपर सिक्सका लागि छनोट भएको छ ।