महिला सशक्तीकरणका विविध क्षेत्रमा योगदान पुर्‍याउने ४ हजार ६९६ महिला तथा बालिका सम्मानित Nepalese Women -

असोज २९ , काठमाडौं । भारतको उत्तर प्रदेशमा महिला तथा बालिकाको योगदानको कदर गर्दै ४ हजार ६९६ जनालाई सम्मान गरिएको छ। ‘मिसन शक्ति ६।०’ अभियानअन्तर्गत शिक्षा, खेलकुद, स्वास्थ्य, सामाजिक सेवा तथा साहसिक कार्यमा उल्लेखनीय योगदान पुर्‍याउने महिला तथा बालिकालाई सम्मान गरिएको हो।

अभियानअन्तर्गत ६ हजार ५७२ महिला एनसीसी क्याडेटलाई ट्राफिक प्रहरीसँगै सडक सुरक्षा तथा सवारी व्यवस्थापनमा परिचालन गरिएको छ। प्रदेशका विभिन्न जिल्लामा सञ्चालन गरिएको अभियानमा महिला खेलाडी, प्रतिभाशाली विद्यार्थी, अपाङ्गता भएका महिला, चिकित्सक, नर्स, शिक्षिका तथा सामाजिक कार्यकर्तालाई सम्मान गरिएको थियो।

सम्मानित हुनेमध्ये मेरठकी दृष्टिविहीन विद्यार्थी रिदा जेहरा पनि छिन्। उनले भगवद्गीता तथा हिन्दी र संस्कृतका विभिन्न पाठ कण्ठस्थ गरेकी छन्। त्यसैगरी, नहरमा हाम फालेकी ४५ वर्षीया महिलाको उद्धार गरेकी महिला प्रहरी निरीक्षक निवेश कुमारी र राष्ट्रियस्तरको पेन्काक सिलाट प्रतियोगितामा उत्तर प्रदेशको प्रतिनिधित्व गरेकी १३ वर्षीया हिमांशीलाई पनि सम्मान गरिएको छ।

सडक सुरक्षा अभियानअन्तर्गत १ हजार ९५६ प्रमुख चोकमा महिला एनसीसी क्याडेट र महिला प्रहरी परिचालन गरिएको थियो। उनीहरूले सर्वसाधारणलाई ट्राफिक नियम पालना गर्न, हेल्मेट लगाउन र जिम्मेवार ढङ्गले सवारी चलाउन आग्रह गर्दै ६३ हजार ५७४ सडक सुरक्षा सचेतनामूलक सामग्री वितरण गरेका थिए।

अभियानअन्तर्गत अक्टोबर १५ मा साइबर सुरक्षा कार्यशाला सञ्चालन गर्ने योजना पनि सार्वजनिक गरिएको छ। उक्त कार्यशालामा सामाजिक सञ्जालको सुरक्षित प्रयोग, अनलाइन ब्ल्याकमेलिङ तथा साइबर ठगीबाट बच्ने उपायबारे विद्यार्थी र युवालाई जानकारी दिइनेछ।

महिला तथा बालिकाको सुरक्षा, सम्मान, आत्मनिर्भरता र सशक्तीकरणलाई प्राथमिकता दिँदै सञ्चालन गरिएको ‘मिसन शक्ति ६.०’ अभियान अक्टोबर ११ देखि २० सम्म जारी रहनेछ।