महिला शटपुटमा चन्द्रकला लामगादेले राष्ट्रिय कीर्तिमान कायम राखिन्

काठमाडौं। राष्ट्रिय खेलकुदको दोस्रो दिन शनिबार महिला शटपुटमा चन्द्रकला लामगादेले राष्ट्रिय कीर्तिमान कायम गर्दा एपीएफ क्लबका पर्शुराम बाँस्तोलाले कराँतेको एकल कातामा स्वर्णपदक जितेका छन् । पुलिसकी चन्द्रकलाले आफ्नै नाममा रहेको कीर्तिमानमा सुधार्दै ११।५६ मिटर थ्रो को कीर्तिमान राखिन् । 

राष्ट्रिय खेलकुद प्रतियोगितामा पर्शुरामले लगातार तीन स्वर्ण जित्दै ह्याट्रिक गरेका छन् । विराटनगरको सहिद रंगशालामा उनले आर्मीका डम्बरबहादुर आलेमगरलाई पछि पार्दै स्वर्ण जितेका हुन् । पर्शुरामले पाँचौं र छैटौं राष्ट्रिमा स्वर्ण जितेका थिए । सुदूरपश्चिमका ललित र मध्यमाञ्चलका सुमन पुलामीमगरले कांस्य जिते ।

त्यसैगरी महिला एकल कातामा प्रहरीकी निर्मला तामाङले स्वर्ण जितिन् । उनले मध्यमाञ्चलकी अप्सरा मोक्तानलाई निराश पार्दै स्वर्ण जितेकी हुन् । एपीएफकी सरिता श्रेष्ठ र सुदूरपश्चिमाञ्चलकी वर्षा साउदले कांस्यमा चित्त बुझाए । पुरुष टिम कातामा पनि एपीएफले बाजी मार्‍यो । उसले अर्को विभागीय टिम आर्मीको चुनौती पन्छाउँदै स्वर्ण हात पार्‍यो । यो इभेन्टमा पूर्वाञ्चल र पश्चिमाञ्चलले कांस्य जिते ।