भारतसँग लज्जास्पद हारपछि पनि पाकिस्तान एसिया कपको उत्कृष्ट टोली भएको प्रशिक्षक रियाजको दाबी

भदौ २१, काठमाडौं। महिला एसिया कप २०२६ अन्तर्गत भारतसँग ७ विकेटको लज्जास्पद हार बेहोरेपछि पनि पाकिस्तान महिला क्रिकेट टोलीका प्रशिक्षक वहाब रियाजले आफ्नो टोली प्रतियोगिताकै उत्कृष्ट टोली भएको दाबी गरेका छन्।

शनिबार भएको खेलमा पाकिस्तानले पहिले ब्याटिङ गर्दै १८।१ ओभरमा सबै विकेट गुमाएर मात्र ५५ रन बनाएको थियो। पाकिस्तानले दिएको सामान्य लक्ष्य भारतले ८।४ ओभरमै तीन विकेट गुमाएर पूरा गर्दै ७ विकेटको शानदार जित निकाल्यो।

पाकिस्तानका लागि मुनीबा अली र शवाल जुल्फिकारबाहेक कुनै पनि ब्याटरले दोहोरो अंकमा रन बनाउन सकेनन्। भारतका बलरमध्ये श्री चारणीले तीन तथा दीप्ति शर्मा र प्रेमा रावतले दुई–दुई विकेट लिए। शफाली वर्माले पनि एक विकेट हात पारिन्।

तर खेलपछि आयोजित पत्रकार सम्मेलनमा रियाजले पाकिस्तान अझै पनि एसिया कपको उपाधि जित्न सक्ने सबैभन्दा बलियो टोली भएको बताए।

उनले भने, ‘हाम्रो टोलीका सबै खेलाडी निकै प्रतिभाशाली छन्। उनीहरूले आफूमा विश्वास गर्न आवश्यक छ। भारतविरुद्ध भएका गल्तीबारे समीक्षा गरेर आगामी खेलमा त्यस्ता गल्ती दोहोरिन नदिने प्रयास गर्नेछौं। परिस्थितिले हामीलाई साथ दिने भएकाले म अझै पनि पाकिस्तान नै यो एसिया कपको उत्कृष्ट टोली हो र उपाधि जित्न सक्छ भन्ने विश्वास गर्छु।’

यसैबीच, पाकिस्तानकी कप्तान सना मिर भने टोली व्यवस्थापनको निर्णयप्रति असन्तुष्ट देखिएकी छन्। एसिया कपअघि टोलीबाट सात खेलाडीलाई बाहिर राख्दै ठूलो संख्यामा परिवर्तन गरिएको भन्दै उनले व्यवस्थापनको आलोचना गरेकी थिइन्।

सना मिरको भनाइबारे प्रश्न गर्दा रियाजले कप्तानको आफ्नै धारणा रहेको भन्दै त्यससँग आफ्नो कुनै सम्बन्ध नभएको बताए। उनका अनुसार टोलीमा गरिएको परिवर्तन आगामी प्रतियोगितालाई ध्यानमा राखेर गरिएको हो।

‘पहिले खेलिरहेका खेलाडीहरूले धेरै विश्वकप र एसिया कप खेलिसकेका छन्, तर अपेक्षित नतिजा आउन सकेन। त्यसैले नयाँ खेलाडीलाई अवसर दिएर आगामी प्रतियोगिताका लागि टोली निर्माण गर्ने निर्णय गरेका हौं,’ रियाजले भने।

उनले टोलीबाट बाहिरिएका खेलाडीले अपेक्षाअनुसार प्रदर्शन गर्न नसकेको दाबी गर्दै नयाँ खेलाडीलाई समावेश गर्ने निर्णय सही भएको बताए।

भारतसँगको हारपछि पाकिस्तानका लागि एसिया कपको सेमिफाइनल यात्रा भने कठिन बनेको छ। अब पाकिस्तानले हङकङविरुद्धको आगामी खेल जित्नैपर्ने दबाबमा रहेको छ। उक्त खेलमा पराजित भए पाकिस्तानको प्रतियोगिता यात्रा समाप्त हुने सम्भावना छ।