पूर्व उपप्रधान तथा अर्थमन्त्री अधिकारीका तीन छोरीहरु काजक्रियामा बसे

फागुन २०, काठमाडौं । पूर्व उपप्रधान तथा अर्थमन्त्री भरतमोहन अधिकारीलाई दागबत्ति दिएर अन्तिम श्रद्धाञ्जलीपछि तीन छोरीहरु काजक्रियामा बसेका छन् । मृत्यु संस्कारमा छोरा मात्र काजक्रियामा बस्ने संस्कार तोड्दै छोरीहरु क्रमश स् लुना, लिमा र लिजा आमा सबितासँगै काजक्रिया संस्कारमा बसेका हुन् । 

स्वर्गीय अधिकारीको सानेपास्थित प्याराडाइज हाइट कोलोनी निवासमा तीन छोरीहरु काजक्रिया संस्कारमा बसेको उनका स्वकीय सचिव महेश विष्टले जानकारी दिए । करिब सात दशक लामो समय वाम आन्दोलनमा समर्पित गर्दै राजनीतिक परिवर्तनमा महत्वपूर्ण योगदान पुर्‍याएका अधिकारीको ८२ वर्षको उमेरमा शनिबार साँझ धुम्बाराहीस्थित ह्याम्स अस्पतालमा निधन भएको थियो । 

श्वासप्रश्वास, मुटु र फोक्सोमा समस्या देखिएपछि २३ पुषदेखि अधिकारीलाई ललितपुरको मेडिसीटी अस्पतालमा राखिएको थियो । तर, स्वास्थ्यमा थप सुधार नभएपछि चिकित्सकहरुको सल्लाहमा २४ माघमा ह्याम्स अस्पताल सारिएको थियो । स्वास्थ्यमा थप समस्या देखिएपछि १६ दिनदेखि भेन्टिलेटरमा राखेर गरिएको उपचार गरिदै आएको थियो । उपचारकै क्रममा उनको निधन भएको हो ।