पहिरोमा पुरिएर उद्धार गरिएकी बालिकाको उपचारको क्रममा निधन

असार ३,काठमाडौं । पहिरोले घर पुर्दा घाइते भएकी पाँचथर फालेलुङ ३ की जुना सावदेनको  उपचारको क्रममा निधन भएको छ । पाँचथर अस्पतालमा उपचार गर्ने क्रममा आइतबार दिउँसो २ बजे उनको निधन भएको जिल्ला प्रहरी कार्यालय पाँचथरका प्रहरी निरीक्षक दिवस कुँवरले जानकारी दिए ।

फालेलुङ–३ खोलाघारीस्थित मावली घरमा बस्दै आएकी जुना मध्यरातमा घरमाथिबाट आएको पहिरोमा पुरिएकी थिइन् ।

झन्डै ७ घण्टापछि स्थानीयले उद्धार गरेर उपचारका लागि सदरमुकाम ल्याइएकी उनलाई जिल्ला अस्पतालका स्वास्थकर्मीले मृत घोषणा गरेका थिए ।

यसैबिच बाढीले बगाँउदा पाँचथरका ५ जना बेपत्ता छन् । पाँचथर प्रहरीका अनुसार हेवा खोलामा आएको बाढीमा परेर फिदिम नगरपालिका १० का २८ वर्षीय सञ्जोग लोवा, हिलिहाङ–७ का ४५ वर्षीय तिलकुमार तामाङ, फिदिम–५ घर भई हाल फिदिम–४ हेवा खोलामा बस्दै आएका ५५ वर्षीय राजकुमार राई, हिलिहाङ–७ का २७ वर्षीय आशिष माझी र उनकी २५ वर्षीय पत्नी एलिसा माझी बेपत्ता भएको प्रहरीले जनाएको छ ।