नौजना युवाले १५ वर्षीया बालिकामाथि बलात्कार, ६ महिनापछि बाहिरियो घटना

भदौ ७, काठमाडौं । बालिका ६ महिनाकी गर्भवती भएको थाहा भएपछि मात्रै घटना बाहिरिएको प्रहरीको भनाइ छ । गर्भवती भएकी नाबालिकालाई हेरचाह केन्द्रमा स्थानान्तरण गर्नका लागि कर्णाली प्रदेश सुर्खेतमा समन्वय भइरहेको प्रहरीले जनाएको छ।

हिमाली जिल्ला डोल्पाको जगदुल्ला गाउँपालिकामा १५ वर्षीया बालिकामाथि नौजना युवाले बलात्कार गरेको घटना छ महिनापछि बाहिरिएको छ। बलात्कार भएको छ महिनापछि परिवारले जिल्ला प्रहरी कार्यालयमा उजुरी दिएसँगै घटना बाहिरिएको हो।

वडा नं ६ बस्ने बालिकामाथि स्थानीय युवाहरूले पटक-पटक बलात्कार गरेको किटानी जाहेरी परिवारबाट जिल्ला प्रहरी कार्यालयमा आएपछि संलग्न नौजनामध्ये तीनजनालाई पक्राउ गरिएको जिल्ला प्रहरी कार्यालय डोल्पाका प्रहरी नायब उपरीक्षक शिव बुढाथोकीले बताए।

६ जना युवा फरार छन्।फरार रहेकाहरूको खोजी कार्य तीव्र रूपमा भइरहेको प्रहरीले जनाएको छ। फरार भएका युवालाई पक्राउ गर्न सजिलो होस् भनेर नियन्त्रणमा लिइएका युवाहरूको परिचय प्रहरीले गोप्य राखेको छ।