टेलिकममा छुटै–छुटको अफर, विदेशबाट आएको फोन उठाउँदा बोनस पाइने

काठमाडौं ।  नेपाल टेलिकमले जीएसएम/सीडीएमए तथा एडीएसएल/एफटीटीएच सेवाका ग्राहकहरुका लागि प्रमोसनल अफर उपलब्ध गराउने भएको छ । 

त्यसैगरी, विदेशबाट आएको कल उठाउँदा पनि अब बोनस प्राप्त गर्न सकिनेछ । यो अफर साउन १६ गते(भोलि)देखि लागू हुनेछ र ९० दिनसम्म रहनेछ । यो अफर अन्तर्गतको सेवा पुराना ग्राहकहरुलाई समेत उपलब्ध हुनेछ ।  

अफरअन्तर्गत अब १ एमबीपीएससम्म गतिको एडीएसएल इन्टरनेट करसहित मासिक रु. १०००।– मा उपलब्ध हुनेछ । पहिले मासिक १०१७।– मा २५६ केबीपीएस गतिको एडीएसएल उपलब्ध थियो । 

त्यसैगरी, भोल्युम बेस्ड एडीएसएलको मूल्य पनि घटाइएको छ । पहिले २१ जीबी डाटाका लागि रु. १९८०।– शुल्क लिइएकोमा अब १५ जीबी डाटा रु. ३००।– मै उपलब्ध हुनेछ । त्यसैगरी, २५ जीबी डाटाको रु. ५००।– र ४० जीबीको डाटाको मूल्य रु. ७००।– मात्र तोकिएको छ । यी डाटाको गति १ एमबीपीएससम्म हुनेछ । 

यस्तै, दर्ता शुल्क पनि घटाइएको छ । पहिले दर्ता शुल्क करबाहेक रु. ५००।– भएकोमा अब भोल्युम बेस्ड डाटाका लागि करबाहेक रु. २००।– र अनलिमिटेड डाटाका लागि रु. ३००।– मात्र दर्ता शुल्क तोकिएको छ । 

यस्तै, अब पहिलेकै मूल्यमा पहिले भन्दा डबल भोल्युमको एफटीटीएच सेवा प्राप्त गर्न सकिनेछ । सो अनुरुप १० एमबीपीएस गतिको एफटीटीएच प्याकेजअन्तर्गत ३ महिनाका लागि २४० जीबी, ६ महिनाका लागि ५०० जीबी र १२ महिनाका लागि १२०० जीबी डाटा पहिलेकै मूल्यमा प्रयोग गर्न सकिने छ । त्यसैगरी, १०० एमबीपीएस गतिको प्याकेज अन्तर्गत १२ महिनाका लागि १२०० जीबी डाटा प्रयोग गर्न सकिने छ ।  

साथै, विदेशबाट आएको कल उठाउँदा पनि अब बोनस प्राप्त गर्न सकिनेछ । जीएसएम/सीडीएमए प्रिपेड र पोष्टपेडका ग्राहकले एक सातामा ७ मिनेट वा त्यो भन्दा बढी कल रिसिभ गर्दा नेपाल टेलिकमको नेटवर्कभित्र ७ मिनेट भ्वाइस कल गर्न र ७ वटा एसएमएस निःशुल्क पठाउनसक्ने छन्।