पुस ६, काठमाडौं । काठमाडौंको तारकेश्वर नगरपालिका–६ स्थित जरङ्खुमा झारफुकको नाममा बिरामी महिलालाई तातो तेल खन्याएर पन्युले डामेको आरोपमा प्रहरीले काठमाडौंबाट थप ४ जनालाई पक्राउ गरेको छ । झारफुकको नाममा आफूलाई माता बताउने १९ वर्षीया सचिता मगरले बिरामीलाई यातना दिएकी हुन् ।
माता उर्फ सचिता र उनका सहयोगीले तातो तेल शरीरमा खन्याएर पन्युले डाम्दा भोजपुर घर भएकी ३६ वर्षीया सविता राई ‘रुपा’ घाइते भएकी छिन् । पुस ४ मा प्रहरीले सचिता मगरलाई पक्राउ गरेको थियो । घटनामा संलग्न थप ४ जना लाई पक्राउ पर्नेमा उदयपुर घर भएका २६ वर्षीय पदम बहादुर मगर, २६ वर्षीय संगम राई, १८ वर्षका सागर मगर र चितवन घर भएका १८ वर्षीय अजित तामाङ रहेको जिल्ला प्रहरी परिसर काठमाडौंले जनाएको छ । चार जना आरोपीहरु झारफुक गर्ने महिलाका सहयोगी हुन् ।
आरोपीहरु विरुद्ध कुटपिट वा अंगभंग सम्बन्धी कसुरमा अदालतबाट ३ दिनको म्याद लिएर अनुसन्धान भइरहेको जिल्ला प्रहरी परिसर काठमाडौंले जनाएको छ ।