क्रान्ति गौडमाथि लैंगिक दुर्व्यवहारको आरोप, भिडियो सार्वजनिक भएपछि चर्कियो विवाद

भदौ २२, काठमाडौं । भारत र पाकिस्तानबीच भएको महिला एसिया कप टी–२० क्रिकेट खेलका क्रममा भारतीय क्रिकेटर क्रान्ति गौडमाथि दर्शकबाट लैंगिक तथा आपत्तिजनक टिप्पणी गरिएको आरोप लागेको छ। घटनासँग सम्बन्धित एउटा भिडियो सामाजिक सञ्जालमा सार्वजनिक भएपछि यसप्रति व्यापक आक्रोश व्यक्त भइरहेको छ।

भारत र पाकिस्तानबीच शनिबार भएको खेलका क्रममा खिचिएको भनिएको भिडियोमा केही दर्शकले गौडको लिंग र शारीरिक स्वरूपलाई लिएर अपमानजनक टिप्पणी गरेको सुनिन्छ। भिडियोमा देखिएका व्यक्तिहरूको पहिचान र घटनाको सम्पूर्ण परिस्थितिलाई भने स्वतन्त्र रूपमा पुष्टि गर्न नसकिएको भारत टुडेको रिपोर्टमा उल्लेख छ।

भिडियो सार्वजनिक भएपछि सामाजिक सञ्जाल प्रयोगकर्ताले महिला खेलाडीमाथि हुने यस्तो व्यवहारको आलोचना गरेका छन्। खेल मैदान तथा सामाजिक सञ्जालमा महिला खेलाडीको शारीरिक स्वरूप र लैंगिक पहिचानलाई लिएर गरिने दुर्व्यवहार लामो समयदेखि समस्याका रूपमा रहँदै आएको भन्दै घटनाले पुनः बहस निम्त्याएको छ।

यसैबीच खेलमा भने भारतले पाकिस्तानमाथि शानदार जित निकालेको थियो। पाकिस्तान १८.१ ओभरमा केवल ५५ रनमा अलआउट भएपछि भारतले ८.४ ओभरमै लक्ष्य पूरा गर्दै सात विकेटको जित हात पारेको थियो। भारतका स्पिनर श्री चारणी र प्रेमा रावतले तीन–तीन विकेट लिए।

यो जितसँगै महिला एसिया कपमा पाकिस्तानविरुद्ध भारतको प्रभावशाली प्रदर्शन जारी रहेको छ। प्रतियोगितामा भारतले पाकिस्तानसँग खेलेका आठमध्ये सात खेल जितेको छ।