क्याम्पस जाँदै गरेकी किशोरीमाथि करणी, प्रतिकार गर्दा हात भाँचियो, आरोपित पक्राउ

माघ ११, काठमाडौं । विद्यालय जाँदै गरेकी १७ वर्षीया किशोरीलाई बलात्कार गरेको आरोपमा प्रहरीले एक किशोरलाई पक्राउ गरेको छ । 

बुधबार बिहान करिब ५ः४५ बजेको समयमा विद्यालय गइरहेकी १७ वर्षीया किशोरीलाई ती किशोरले सप्तरीको विष्णुपुर गाउँपालिका– ७ स्थित कोशी पश्चिमी नहरको दक्षिणी क्षेत्रमा बलात्कार गरेको प्रहरीको भनाइ छ । बलात्कार आरोपमा विष्णुपुर– १ का १९ वर्षीय अकलेशकुमार मण्डललाई पक्राउ गरी कारबाही अगाडि बढाइएको सप्तरी प्रहरी प्रवक्ता डिएसपी जितेन्द्रकुमार बस्नेतले बताए।

बलात्कारको प्रतिकार गर्ने क्रममा किशोरीको बायाँहात भाँचिएको छ भने शरीरका विभिन्न भागमा चोटको नीलडामसमेत रहेको डिएसपी बस्नेतले जानकारी दिए ।

दैनिक झैँ बिहान ५ बजे साइकलमा कलेज जाँदै गर्दा मझाउ टोलबाट पूर्व साइफन पुल नजिकैको एकान्त स्थानमा आरोपी मण्डलले रोक्ने प्रयास गर्ने गरेको पीडित किशोरीले बताइन् । बलात्कारको समयमा समेत प्रतिकार गर्दा हात भाँचिदिएको उनले प्रहरीलाई वयान दिएकी छन् ।

कक्षा ११ मा पढ्ने किशोरीकै जाहेरीका आधारमा आरोपी अकलेश कुमारलाई पक्राउ गरिएको डिएसपी बस्नेतले बताए ।

आरोपित अकलेशलाइ बिहीबार सप्तरी जिल्ला अदालतबाट १० दिनको अनुमति लिएर थप अनुसन्धान सुरु गरेको बस्नेतले जानकारी दिए ।